隨心 境界

我係一個好嚮往自由嘅人（廢話！邊個唔鍾意自由？）我嘅自由概念，除咗係可以周圍去，周圍食之外，瞓覺隨心，瞓到自然醒，醒咗再瞓，無拘無束。所以除咗我喜歡嘅人和事可以令我去接觸外，其他時間我都係做緊一個開心嘅廢人。

前兩個星期周國豐搵我上佢同伍仲衡嘅直播節目，我二話不說就say yes！因為國豐係我伯樂。之前係佢搵我去香港電台同佢一齊做「娛樂滿天星」。雖然佢時時窒我，笑我，但我可以感受到佢其實好保護我。所以佢絕對係我嘅貴人，得人因果千年記！所以我一定唔會托佢手踭。

同周國豐與伍仲衡一齊做節目，感覺就係同好朋友玩咁，好enjoy……今次美中不足，係大家講笑途中，我哋冇提及任何人嘅名字，但被傳媒將說話含沙射影地將別人對號入座。

面對別人嘅非議與批評，我一向都冇乜所謂。對於自己唔去解釋就唔理解我嘅人，多數我都冇乜機會接觸，所以都唔駛理會或在意呢啲人嘅睇法。但今次無端端躺着也中箭嘅「朋友」，我卻不能不在意無辜者嘅感受，我必須要講句：「對唔住，畀咗麻煩你，衷心抱歉。」

{{hket:inline-image name="3563.jpeg"}}{{/hket:inline-image}}

（作者提供圖片）

快樂祕笈係要學習同練習㗎。我就時刻提自己對喜歡嘅人和事要不遺餘力，對討厭嘅人和事盡量露出微笑；我唔能夠選擇點樣生，點樣死，但可以選擇點樣愛，點樣活。

我提醒自己允許自己被否定，被批評，但心裡亦要明白話畀自己聽呢啲並不能說明任何事，只係別人嘅個人判斷，自己無須認同，因為無論點樣表裡如一，喺別人嘴裡亦各不相同。所以我必須要熟練掌握令自己開心快樂嘅生存技巧。Be Good！但係亦要Be Myself！

（本欄逢星期四刊登）