繁忙的都巿，不少人都受情緒病困擾。參加《中年好聲音》比賽，勇闖入12強，排名11的曹敏寶，37歲的她嫁得好老公，育有一子一女，湊成「好字」，別人眼中都感覺到幸福。其實她的人生不止一次陷入低潮，事業不如意之餘，2019年生了大仔林靖濤（Darius）後患有焦慮症，嚴重得產生幻覺，險些發生意外；除了得到家人協助走出困局，最慶幸應該是她有一把自救的聲音。而走過的痛苦經歷，她不敢怨天尤人，反而感恩有家人、朋友陪伴。
表面上，性格開朗的曹敏寶，接受《晴報》訪問時，立即否定這個形容詞，她坦言都有「收埋」自己的時候。重提當年患病慘況，提起家人又淚如雨下。她表示家人是她的「死穴」，十分感恩自己一直被愛包圍，有家人貼身照顧，助走出困局，稱︰「產後誘發有焦慮症，我嘅傷口發炎，又要食情緒藥，當時我個人虛脫，處理唔到事情。食藥令到我身體、精神狀態都好惡劣，而且因為食藥令到我體重升至160多磅！作為女仔加上做過藝人著重外表，當時完全接受唔到自己。」
患病期間，最嚴重的時候，曹敏寶出現幻覺，而且失控，使她感到害怕，「腦入面有好多恐怖畫面，完全控制唔到！我住村屋要上落樓梯，我日日同老公講200次，叫佢抱住個仔時要貼住牆邊行，因為我幻想個仔會跌落樓梯......」
由於太恐懼有危險事情發生，她甚至害怕去抱兒子，亦試過情緒失控得崩潰狂喊，「我係咁喊！不斷發洩，怕自己會做傻事，就叫老公同阿媽一人一邊捉住我隻手，控制唔好做傻事。」幸好一直在家人愛的包圍下成長，再壞的情緒發作時，也不敢有輕生念頭，怕傷了家人的心，「我幾唔開心、困惑，諗埋一邊嘅時候，大前提唔可以傷害阿媽同埋屋企人。阿媽一直教得好好，佢畀好多愛啲仔女，所以再難捱，都要調節心情，顧及身邊人。人唔可以自私，為自己而活，唔可以傷害愛嘅人之外，我仲要照顧仔女，同自己講，無論點我都會過難關！」
患上情緒病，曹敏寶沒有怨天尤人，反過來感恩自己很幸福，除了有家人之外，慶幸有個好老公。當時老公不顧自身，貼身照顧，令她感內疚，憶述：「老公為咗湊住我同BB，每日瞓得兩個鐘，當時佢負出120%，為咗湊B喺屋企上上落落300次，其實好攰。當時佢食好少嘢但最肥，身體有問題又水腫，我睇番佢當時個樣都好心酸，為照顧我同屋企去到呢個地步。」
至於好友朱智賢亦看不過眼，出手相救，直接走到曹敏寶位於元朗區的住所，鞭策她跑步做運動，之後又鼓勵她學車，出巿區跟朋友約會，重新建立健康社交圈，曹敏寶說：「好幾年我唔想見人，就算老友周吉佩、朱智賢都係見過一、兩次。有次朱智賢見我喺屋企，就話『你唔使同我做太多，同我去跑步，或者只係行吓。我都貪靚就試一下啦，幾好成績呀！由160減到130幾磅，點知發現有第二胎又漲番。我都想生多個嘅，就算有第二胎肥番，反而個人都變得積極咗。」
曹敏寶有兩個家姐，除了眾所周知的「香港小姐」曹敏莉之外，還有顏值甚高的大家姐曹敏芝，大家姐介紹了現任丈夫給妹妹認識，是二人之間的「紅娘」。曹敏寶表示與前度男友分手後，搬往大家姐家同住，但生活得像行屍走肉般，「當時失戀呀，住喺家姐屋企兩個月，帶住同前度養嘅兩隻狗一齊......我連自己都治理唔到，好迷失，後尾係家姐介紹男仔我識。慢慢走出創傷，再規劃自己未來。」
曹敏寶經歷波折重重。她自小便喜歡唱歌，年幼時唱王傑的歌曲，琅琅上口。長大後參加過大大小小的歌唱比賽，除了校內比賽外，2003年跟朱智賢一起參加香港女團「Cookies的選拔賽」。當時曹敏寶還得了亞軍，本有機會入行，奈何母親覺得女兒太年輕，要先專心學業，後到澳洲升學。
回港後，她在醫院擔任公關，死心不息又跟唱片公司簽約做歌手，表示：「2010年有人介紹我簽獨立唱片公司，出咗人生第一張個人專輯，改埋名曹蕙蘭，可能改得唔好啦！做晒碟之後公司執笠，唱片上架但冇宣傳，呢次真係人生第一個低谷。我轉去做化妝師，遇到另一位伯樂，出咗幾年發燒碟。好感恩，以為唔會再唱歌，只能夠做『浴室歌后』，原來有人會欣賞，留意到我。同時學阿媽話，入娛樂圈真係好講你條命係點，天上有冇粒星照住你？係咪啱行呢條路？」
有得有失，曹敏寶在娛樂圈認識到不少真朋友，在有線做主持人的時候，識到周吉佩，二人感情猶如「兄弟」，共富貴也共患難，可以盡吐心中情。快踏入「中年危機」，曹敏寶自有一套方法面對，「人去到中年，仲有力氣追夢就去追，就算有負評，都唔好忘記自己的心態。老公任我出去闖，我就去參加《中年好聲音》，我只係想日子開心，身邊人健康，有福報就好，呢個係我餘生課題，放下執念好重要，放下執念，就係得到一切。」同時以母親教女的方法，灌輸愛的訊息，希望自己仔女長大後，無論如何也懂得愛人。
撰文：王連連
攝影：何家賢、馮凱宜
場地提供：The AIR（The ONE L16）
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】