鄭世豪母親設靈｜鄭世豪母親心臟病逝受訪三度痛哭 自覺衰仔少陪伴：阿媽撐咗好耐

鄭世豪母親戴秀蘭9月10日因心臟病離世，終年77歲，今日（4日）在紅磡寰宇殯儀館設靈，多位圈中好友及電視廣播有限公司亦有送上花牌表達心意，包括王祖藍、樊亦敏、陳浚霆、徐榮夫婦、羅樂林、鍾志光、楊明、莊思明、白彪、何啟南、許家傑、焦浩軒等，而羅樂林及阮德鏘更親身到場悼念。

同場加映：黑妹韋綺姍薪火相傳率學生演出 吉吉啟豪深明癌症之苦義唱助人

{{hket:ul-video id="9259"}}{{/hket:ul-video}}

鄭世豪約下午4時到場，好友陳少邦同行，鄭世豪接受《晴報》訪問時，表示心情已平伏：「我媽好叻，年頭開始入醫院，今次第8次入醫院，呢次入咗兩個月。我媽好好，好為人着想，我哋都覺得我媽今次離開係為屋企人『着想』，畀咗好多心理準備我哋，所以我哋一家人都好平伏（平靜）。」

{{hket:inline-image name="4.jpeg"}}{{/hket:inline-image}}

鄭世豪表示全家一齊幫媽媽辦後事，希望媽媽知佢哋乖，繼續聽話好好生活，佢又表示網上都有好多朋友好有心留言慰問，support佢度過呢個咁傷感嘅時刻，但佢就未能一一回覆。鄭世豪表示之後都會繼續開工，未有向無綫告假：「要處理嘅事都處理完，送埋阿媽呢一程咁都ok。」佢又指媽媽生前都有唔少「任務」交畀佢，講起時又忍唔住喊起嚟：「其實阿媽呢兩個月，日日去探佢，佢仲講到嘢都交低好多事件畀我去處理，例如我屋企嘅親戚（人數）實在太龐大，佢好多家姐細妹……仲有好多嘢都委託我幫佢完成埋佢，我會記得佢講嘅嘢，跟住再去處理。」

鄭世豪又痛哭自責自己喺媽媽生前冇花太多時間陪伴佢：「我係衰仔，點解我咁講，因為我做呢個行業，某程度入咗劇組、開三個月……好難請假，有時屋企人想去旅行，成日夾唔啱時間陪佢周遊列國、去玩，就算有時阿媽搞生日，我都因為開工去唔到……我覺得自己為咗做嘢而令到冇咗呢啲陪伴嘅快樂時光，係有啲遺憾。」

鄭世豪提到媽媽非常堅強撐咗兩個月：「我媽其實係好細個開始已經有心臟病，一直要食一啲藥物，到上年年尾轉差，一直喺醫院出出入入，因為心臟開始衰弱，令身體好多器官嘅機能都support唔住。我哋去探佢時講好多加油，出院一齊去旅行……但去到最尾都唔得。阿媽好叻，撐咗好耐，畀好多心理準備我哋去送佢最後一程。」

圖片來源：《晴報》圖片