7仔首聯乘老字號鑽石酒家 推懷舊小食點心

最近7-Eleven自家品牌7-SELECT及HOTSHOT熱賣點，首度與本地著名老字號鑽石酒家聯乘，推出一系列懷舊小食和點心。黛安聽聞，鑽石酒家由燒鵝聞名中外、人稱「燒鵝輝」嘅甘穗輝喺1947年創立，吸引唔少食客慕名去飲茶同舉行婚宴等，盛載咗幾代人嘅回憶。

今次7-Eleven與鑽石酒家合作打造4款聯乘新品，包括古法馬拉糕、XO醬粉果、荔枝蘋果紅茶及XO醬撈麵，售價由$15至$19，全部都係香港製造及選用優質食材製成㗎！此外，仲有鑽石酒家採用自家滷水配方特製嘅五香滷水鴿，每件只售$38，各款包裝加上經典龍鳳設計元素，令懷舊風格更突出。

7-Eleven與鑽石酒家聯乘系列即日起發售，黛安都要約埋好姊妹買嚟試下，一齊細味老香港情懷！