買美股須注意事項

最近美股又急升，幾乎重現幾年前美股不斷破頂嘅勢頭。明明債務危機、加息、經濟疲弱等問題依然存在，但美股偏偏繼續有得升。

市場部Peggy幾年前開始已經聽到同事話喺美股賺到錢，一直心思思想買，但奈何遇上疫情，又加上環球股市轉跌，所以仲未行動。

直到呢段時間，Peggy又想向海外股市出發，但就無從入手，所以就問曉陽，有咩注意地方。

其實買美股，最基本要留意4樣嘢。首先係交易時間，因為有時差關係，美股交易時段喺香港凌晨時分，如果要進行貼市交易，就要喺凌晨捕住個美市，唔係人人都可以做到，所以想投資美股，又想短炒嘅話，就要留意時間。另外，美國股市有分夏令同冬令時間，想買美股唔能夠唔注意。

除咗交易時間，第二樣要注意嘅，就係認購數量。買賣港股，最細單位係1手，按照唔同嘅股票，1手可以係100股、500股，甚至1,000股不等；但美股就好唔同，以1股作為單位，買賣時候就要留意，唔好撳錯數量。

另外係交易結算時間同收費。雖然同港股一樣，美股都係行T+2，但因為香港同美國有時差，所以結算喺下一個交易日處理，前後可能橫跨3日，如果遇到假期，更會延期處理。

而更重要嘅係，大家透過證券公司投資美股，投資交易收費有機會同香港唔同，因為部分證券公司會因應唔同地點，而收取唔同嘅收費，所以喺交易之前需要問清楚。

（本欄逢周四刊登）