歌神下凡

許冠傑被譽為香港樂壇嘅「歌神」，真係當之無愧！佢嘅歌曲，帶咗好多希望同正能量畀香港人。唔使講到咁遠，淨係我識嘅祁文傑，絕對視許冠傑為佢嘅神！佢年輕時每當心灰意冷、遭遇不幸，或遇上無數個逆境，都係Sam嘅歌令佢重新振作。所以每逢講起之前許冠傑點樣成為佢嘅守護神，佢都會悲喜交集。悲，係因為講番起啲不堪往事；喜，係好彩有Sam撑住佢！

而Sam喺我童年至青春時，帶畀我好多喜慶嘅歡樂！尤其每逢新春檔期大電影，必定要睇佢做嘅賀歲片，要聽六嬸、三太公嘅打雀英雄同埋財神到，特別有嗰份喜慶感受……所以Sam喺我嘅印象係代表喜樂！喺我哋呢個年代長大嘅，阿Sam雖然係巨星歌手，卻又好似親人咁親密。

我好幸運，之前拍電影時，認識咗許冠傑嘅細仔Scott，佢同佢哥哥雖然係歌神嗰仔，但係超級謙卑。甚至喺Sam上－個演唱會我有機會訪問佢，佢知道我叫蘭子，係佢仔嗰朋友。嘩！我受寵若驚！貴為歌神，又係－個慈父，佢謙卑、幽默，真係由頭到尾都散發住正能量同愛。

Sam退隱多時，各方面不斷游說佢復出，但佢不為所動，一一推卻，過着逍遙寫意嘅簡單生活。但佢並沒有脫離群眾，佢嘅心常繫香港，關心着香港社會發生嘅每一件事態，關愛着每一個香港市民，同我哋憂慼與共。每逢香港經歷低迷，Sam為了鼓勵大家解開鬱結、重拾信心，佢都會正式「下凡」，用親切動人嘅歌聲，溫暖每個香港人嘅心，令香港人重燃拼搏精神，回復昔日的笑臉。

許冠傑，我哋嘅「歌神」，好多謝你用咁pure、咁true嘅心，咁愛音樂、咁愛歌迷、咁愛香港！（本欄逢周四刊登）