阿斯利康夥科技園助初創落戶 連繫大灣區

今屆政府銳意推動創新科技，近期仲積極吸納人才同公司來港落戶，其中包括知名生物科研製藥公司阿斯利康，呢間公司雖然喺香港植根已逾30年，前年起更同科技園合作，推出培育初創企業嘅共同孵化器。黛安聽公關姊妹講，前日雙方簽署合作備忘錄，期望吸引更多境外同內地企業落戶園內，連繫大灣區嘅醫療機構、科研領袖同本地大學，打造本港成為全球生物科技中心。

作為孵化器嘅「推手」，阿斯利康屆時將會為有潛質嘅海外初創公司提供意見及支援，包括引進到科技園、喺香港設立辦事處等，而科技園就負責推廣。阿斯利康國際業務及中國總裁王磊喺簽署儀式上話，希望透過加大投資孵化計劃，支持香港創科走向國際市場。創新科技及工業局副局長張曼莉話，今次合作除咗印證本港係生命健康科技上雄厚實力，亦促進上下游工業互動。