風險未除 銀行股暫勿沾手

近期嘅話題，離唔開美國嘅矽谷銀行事件。最終美國聯儲局出手解決，事件總算告一段落。

行政部Mable睇完新聞，就覺得會唔會係銀行危機重現嘅先兆，尤其美國加州有大量民眾去攞錢，結果導致擠提，經歷3年新冠疫情之後，銀行業莫非要爆煲？

先唔好講銀行業是否有危機，單單講今次救市嘅策略，其實並無化解整體嘅風險；同一時間，部分矽谷銀行嘅業務被收購，例如喺英國嘅業務被滙豐（00005）以象徵式1英鎊收購，只不過將矽谷銀行嘅風險轉嫁畀滙豐。

Mable就問，銀行股係咪唔適宜長揸？因為流動性風險仍然非常高。

曉陽覺得，要揀銀行股，現階段未必適合，尤其部分銀行承受緊政治風險，例如剛才提到嘅滙豐，可能係受到政府壓力先出手救忙，而事後滙豐向矽谷銀行英國業務注資，此舉無疑對滙豐嘅盈利造成壓力。

Mable接住問，遇到呢啲事件，買金係咪可以避險？

其實無論任何市場風險出現，黃金都係相對受歡迎嘅避險工具；不過，買實體黃金同金礦股係兩回事，前者相對屬於保值為主，後者就對黃金價格比較敏感。如果唔想為股價走勢而煩惱，買實體黃金相對會比較穩陣；但如果希望借金價走勢進行炒波幅，金礦股就較抵玩。

但要留意，市場現時規避風險嘅方法已經較多，黃金並唔係唯一避險工具，所以無論買實體黃金抑或金礦股，都要三思而後行。

（本欄逢周四刊登）