毒舌大狀｜大量失血病人飲水會死得快啲？ 外科醫生拆解橋段分析2大致命風險

大量失血病人可否飲水？打破香港史上華語電影票房紀錄的《毒舌大狀》，其中一個橋段令觀眾疑惑，大量失血病人飲水是否真的會「死得快啲」，外科專科醫生黎逸玲本周四（9日）撰文拆解有關醫學迷思。

同場加映：
Healthy Life︳長時間坐下工作致腰背僵硬 2個瑜伽動作紓緩腰酸背痛

{{hket:ul-video id="7468"}}{{/hket:ul-video}}

原文內容：

唔知大家睇咗《毒舌大狀》未呢？戲入面有一個非常有趣嘅醫學問題：一個大量失血嘅病人係咪唔可以畀水佢飲？飲完會死得快啲？

創傷病人（trauma patients）嗌口渴其實屬於正常生理現象，當身體受傷大量出血，體內平衡機制會立即分泌大量腎上腺素，令到非重要器官（包括消化系統、四肢、腎臟）嘅血管急劇收縮，從而迫使血液集中流向腦部和心臟。當呢啲非重要器官出現缺血情況，就會向大腦求救，而大腦就會經腦下垂體發出命令要補充水分填補血管內容量，所以病人就會覺得口渴想飲水。

既然傷者要補充水分，咁點解又唔好畀水佢飲呢？首先，大量失血嘅病人大多處於意識模糊狀態，吞嚥能力變弱，呢個時候飲水極大機會會嗆到，過多水分誤入氣管會導致吸入性肺炎（aspiration pneumonia）、窒息，之後併發呼吸衰竭甚至死亡。再者，傷者送院後理應需要進行全身麻醉緊急手術，若果胃部充滿食物或水分，就會容易嘔吐增加吸入性肺炎嘅風險，咁亦都解釋咗點解大家平時做手術前都要禁食6個鐘或以上。大家千祈唔好睇小吸入性肺炎，呢個係死亡率非常高嘅病症！

=== 以下含有少量劇透 ===

電影入面有關Elsa死因嘅說法，係被鍾京頤灌飲大量蒸餾水去「溝稀」血液濃度致死。從創傷學角度睇，有關血液被稀釋嘅學術討論主要圍繞靜脈輸液，而非飲唔飲得水。大量失血嘅病人送院後要盡快輸予一定比例嘅紅血球、血小板同血漿（massive transfusion protocol），務求迅速補充血細胞去輸送氧分同營養去各個器官，同時避免因過度稀釋而影響凝血功能，所以醫生唔可以只係靠生理溶液去幫病人進行復甦急救。

其實曾潔兒只係行開咗2分鐘去打999，鍾京頤就灌到Elsa飲晒1公升蒸餾水再掉埋個樽，我絕對有理由相信Elsa會濁親仲要濁到爆，因此佢嘅死因應該喺吸入性肺炎或者腦出血機會比較大。當鍾京頤喺庭上聽到林涼水嘅指控之後O咗嘴，佢心裡面應該係：「吓？我想濁瓜個女啫，冇諗過要溝稀佢啲血喎！」不過你想像吓如果改咗林涼水喺庭上嘅對白，成件事就即時變得冇咁型！作為一套賀歲法庭（科幻）片而非醫療學術片，我惟有本著「睇故就唔好駁故」嘅心態，但又真係好多朋友同病人都有相同疑問，所以決定喺度寫少少咁啦......

{{hket:inline-image name="325117358_542319621016956_4362604420007325481_n_600.jpg"}}{{/hket:inline-image}}

文章內容獲黎逸玲醫生授權刊登