「金沙之光—古蜀文明展」 近距離觀賞逾70件珍稀文物

國家一級文物好珍貴，唔係經常有機會睇到㗎，最近香港文物探知館正舉行「金沙之光—古蜀文明展」，展期至3月29日，大家可以近距離觀賞73件四川文物和1件複製品，當中14件係國家一級文物，國家文物局更特准7件香港出土文物一同參展，家長可帶小朋友一同參加，從多角度認識古蜀嘅高度文明，活動免費入場㗎。

黛安知道，今次展覽最矚目包括金沙遺址中最重要嘅國寶級文物「太陽神鳥」金箔飾複製品，精湛黃金工藝可體現古蜀嘅高度文明和重視祭祀嘅文化；同時可睇到同屬國家一級文物嘅金人面像和蛙形金箔。

場內仲特設工作坊，可加深大家對文物及古蜀文明嘅了解。其中本月25日有兩場名師剪紙工作坊，由著名剪紙藝術家李雲俠指導剪出金沙文物紙飾，2月中可於網上預先報名；3月18、19日亦有貼金書籤工作坊，3月初可網上預先報名，工作坊嘅名額會以抽籤形式處理。