東張西望丨港男稱Staycation床上沾新鮮糞便 不滿酒店處理手法：即係話我瀨屎？

日前一名港男喺Facebook群組大呻自己Staycation嘅不愉快經歷，聲稱自己喺酒店嘅床上沾上第三者嘅糞便！而最令佢氣憤係酒店經理回覆佢嗰陣嘅惡劣態度，港男忍無可忍，上無綫資訊性節目《東張西望》現身說法。

日前一名港男喺天水圍一間酒店同一家大細十幾人Staycation，自稱喺酒店房嘅床上揩到唔屬於自己同家人嘅糞便，佢圖文並茂出post：「下午check in完就上房擺低背囊，再成班人一齊去行街，夜晚食buffet仲多人有成20幾個（有啲只join buffet），直頭當係團年飯㗎喇。到9點食完就準備同女朋友返613號房，因為行街行咗成日都好攰，所以就直接由床頭捐入被竇再趴係度攤唞下。跟住趴趴吓就聞到一陣臭味，女朋友話佢聞唔到，而我係一路keep住聞到臭，咪落床周圍睇下囉！」

同場加映： 蘇麗珊轉跑道做歌手要有強大心臟 負評不上心 感恩男友成最大後盾

{{hket:ul-video id="7408"}}{{/hket:ul-video}}

港男揭開張被嗰一下，女朋友都嚇到嘩嘩聲，事關見到張床有啲啡色嘢，開頭以為係朱古力仲走去聞添！最終確認真係屎！而港男嘅面褲右邊邊屁股位置都沾上糞便，「揩咗落我着緊嘅唯一嘅褲上面...真係乾嘔咗幾吓，再衝入廁所清潔，之後即刻打電話落前台，結果打咗成10分鐘都唔通，係所有部門嘅電話都唔通！惟有着住條屎褲同我女朋友一齊落去大堂。」

港男去到酒店前台講述情況，前台職員安排換房，同幫佢清洗衣物，再搵其他同事跟進，佢話︰「如是者我哋就上返房等，因為間酒店冇浴袍提供而我又冇其他褲替換，所以就着住條屎褲喺度等，結果等咗成15分鐘先有個大堂經理過嚟，阿大堂經理一嚟到就話：『我check咗CCTV㗎喇，睇到房務有拎套新床單入房，之後有拎床單出嚟，佢哋係有做清潔嘅。』當時我仲着住有第三者屎跡嘅褲，聽到佢咁講嗰一下真係嬲到癲！問番經理：『咁你即係話我瀨屎？』個經理竟然話：『唔排除呢個可能性。』我女朋友就出聲：『我哋梗係check咗唔係自己問題先搵你啦！條底褲冇屎㗎！你咪自己睇下囉。」

{{hket:inline-image name="10.JPG"}}{{/hket:inline-image}}

大堂經理表示一定會跟進事件再了解清楚，換房同提供浴袍予港男，話大約兩個鐘洗好佢嘅污糟衫。經理又聯絡事主哥哥，話事主情緒好激動，所以先聯絡冷靜啲嘅哥哥，問佢想要乜嘢賠償。最後港男等咗8個鐘再打電話追問，先至成功拎返條褲。check out時港男再追問酒店跟進情形，經理都只係重覆昨日嘅說法，亦唔排除任何可能性，而港男家人就要求酒店道歉，但經理表示：「要我個人道歉當然冇問題，不過而家唔係百分之百證明係酒店方面有問題，所以我係唔會代表公司道歉嘅。」港男最後問經理有咩投訴方法，經理就話要投訴佢都阻止唔到。

港男一家離開酒店，佢好介意同行嘅4歲外甥女，第二朝問佢「係咪瀨屎」，坦承「身心受創」。佢強調唔係要啲咩賠償，只係要酒店方面道歉。「花生友」網民表示呢件事算係「口同鼻拗」，持觀望態度，又有人當正自己係福爾摩斯反指事主有古怪，留言：「屎褲竟然唔影相？重要着埋條有屎有味嘅褲落去投訴？唔係自己嘅屎應該唔會去聞，話知佢咩嚟！冇可能吧？正常人即刻入屎坑掉咗條屎褲，去沖涼啦？張床嘅屎又唔似好耐...」又有人話，唔排除事主自己揩到屎帶埋上房；同時有唔少人撐事主，無論事實係點，經理嘅處理手法都難免令人感到不快。

撰文︰娛樂組