港鐵尖東站隧道換壁畫新裝 配合AR與地標合照

最近黛安經過港鐵尖東站，發現尖東站至尖沙咀站行人隧道換咗色彩斑斕嘅新裝，吸引唔少途人駐足欣賞。原來係港鐵為響應運輸署推出「香港好‧易行」計劃，請咗本地資深插畫及平面設計師鄭琪琪為呢段行人隧道大變身，將原本嘅紅、黃、綠三區，變身大型壁畫。壁畫上每個景點仲設有QR Code，只要掃一掃即可體驗AR技術與對應嘅地標圖案合照，並連結至「香港出行易」流動應用程式，輕輕鬆鬆就搵到各個地標。

呢個超過200米嘅藝術壁畫勾畫出尖沙咀各個重要地標，仲可分3大主題，如風景名勝、藝術文化及購物熱點，包括維港美景、星光大道、太空館、海港城、K11 MUSEA等，大家不妨停下腳步，盡情打卡留念。