樂富廣場逾萬呎躍動+農莊 本月免費玩閃避球德國走繩

小朋友喺成長期最愛蹦蹦跑跑，假日尋覓放電場所係令唔少家長頭痛嘅課題。領展為迎合市民嘅需要，以社區營造為概念，喺多條行山路綫起步點嘅樂富廣場，開闢逾萬呎嘅戶外躍動休憩空間，令運動文化可融入社區。商場除咗劃出A、B區以「山嶺」同「躍動」做設計主題，仲邀請智樂兒童遊樂協會喺特定日子出動「智樂遊樂車3系」，以流動形式為小朋友創造自由遊戲體驗㖭。

公關姐妹話，同場仲有坐擁近3,000呎都市農莊，喺本月至12月會以「樂動‧農莊」為主題舉辦一系列免費活動，包括躍動閃避球對決、德國走繩等，下月仲有100人即興Art Jamming，作品會用作義賣，幫助兒童全面發展。

領展香港租賃董事總經理霍業生話，今次「以人為中心」塑造多元公共空間，令商場成為社區參與同市民互動嘅好去處，希望能提升居民歸屬感之餘，亦可強化社區意識。智樂兒童遊樂協會聯席副主席孔慶暘指，商場空間廣闊，令協會提供更多有趣益智嘅遊樂設施，希望為小朋友創造自由同與別不同嘅遊戲體驗，可幫到佢哋身心健康全面成長。