慶祝英雄誕生60年 原創蜘蛛俠精品登陸LOG-ON

唔少大人同小朋友都係蜘蛛俠（Spider-Man）嘅粉絲，今年係蜘蛛俠角色面世60周年，黛安知道，為咗紀念呢個特別日子，LOG-ON由即日起至21日，特設「Sixty Amazing Years蜘蛛俠驚奇誕生60年」主題專區，搜羅多款首次喺香港亮相嘅獨家Marvel原創蜘蛛俠精品，及蜘蛛俠60周年紀念版Cosbaby（S）迷你珍藏人偶。場內更設有蜘蛛俠打卡位，以漫畫風格和標誌性嘅紅、藍兩色，復刻出蜘蛛俠招牌嘅翻躍噴絲動作，「蜘蛛迷」一定要去朝聖兼打卡呀。

公關姊妹話，原創精品包括「蜘蛛俠漫畫風滑板」（$340）、「蜘蛛俠主題菲林相機」（$248）、蜘蛛俠造型簇絨地墊（$649）等。而3款Hot Toys嘅迷你珍藏人偶亦好吸引，當中蜘蛛俠（夜色版）Cosbaby（S）着上藍色戰服，一手擺出射蜘蛛絲手勢、一手拉住蜘蛛絲，與紐約市夜景融為一體，營造獨特視覺效果，必定令粉絲愛不釋手。