亞洲清酒大賞評盡437款美酒 下月公布最佳之選

香港有唔少清酒愛好者，黛安知道，上星期喺香港舉辦嘅「亞洲清酒大賞（Oriental Sake Awards）2022」，連續兩日評審咗多款參賽清酒，公關姊妹話，主辦單位日本酒業連合會希望透過舉辦比賽，掌握亞洲消費者嘅清酒口味，令比賽日後能成為亞洲最具認受性和消費者歡迎嘅優質清酒指南。

今年比賽得到日本駐香港總領事館、日本貿易振興機構和香港日本料理店協會等機構支持，集合來自日本40多個都道府縣嘅437款清酒。酒武士陳銘基同埋由日本遠道而來嘅清酒大師松崎晴雄分別帶領30位清酒專家進行評審，品質優秀嘅參賽清酒將授予金、銀或銅牌，同時會評選出年度最佳清酒，得獎名單會喺9月5日公布，年度清酒則於9月15日公布。鍾意飲清酒嘅朋友可留意「亞洲清酒大賞」fb專頁嘅動向。