如心廣場「如心音樂祭」 人氣歌手組合輪流唱

近年香港有唔少新晉人氣男團女團都大受歡新，黛安知道，為支持本地流行文化發展，今個星期日（26日）及7月2日一連兩個周末，荃灣如心廣場中庭將舉行「如心音樂祭」，邀請咗多位人氣歌手及組合輪流獻唱，首場就有人氣樂隊One Promise、選秀節目出身嘅雲浩影（Cloud）等；下星期六就輪到JW王灝兒、「聲夢」嘅姚焯菲（Chantel）等助陣。佢哋除咗演唱外，每位歌手仲會同在場歌迷分享個人點滴，等粉絲了解佢哋嘅日常生活。另外，同場仲設有追星潮語燈飾打卡位，大家可以去影番輯靚相。

講到追星，黛安就諗起「Yes！Card」，由閃卡、貼紙、海報到大型精品，都極具收藏價值。公關姊妹話，即日起至7月3日，場內會開設《YES！CARD》Pop Up Store及擺放扭卡機，限定店除咗有當紅偶像嘅周邊商品如5R相、文件夾、筆記簿及福袋等，更會出售當紅YouTube頻道《Yes！X試當真》及《Yes！X熊仔頭》限量版精品等，粉絲千祈唔好錯過啊！