傑出義工嘉許禮復辦 獲獎人數創新高

香港義工聯盟每年都會舉辦「傑出義工嘉許禮」，但去年因疫情而停辦，公關姊妹同黛安講，今年嚟到第7屆，獲嘉許嘅人數創歷年新高，共有逾2,400名義工及500多支義工隊獲得嘉許。嘉許禮日前已舉行，黛安聽聞，今年新增咗「最美抗疫義工獎」，表揚一班無懼疫情、積極抗疫嘅義工，感謝佢哋為弱勢社群燃點希望。

另外，整個嘉許禮最受注目嘅係頒發「傑出義工領袖」獎，今年共有5位義工領袖獲獎，佢哋服務嘅對象包括長者、青年、環保、兒童教育及貧苦基層等，涵蓋範圍廣泛，佢哋帶領義工團隊無私咁為社區服務，喺疫情嚴峻期間亦無退縮，投入大量心力和時間共同抗疫，真係令人好感動。