一起走過︳尹天照自爆主持兒童節目「兇」細路 難忘林正英勸做人不用太執著

尹天照83年畢業於亞視藝訓班，早期出道是兒童節目《500飛虎隊》的主持，後來聽從已故資深藝人王偉意見，放棄爆騷的綜藝節目，轉為向戲劇方面發展，先後得到梁天、蕭笙及冼志偉幾位監製兼伯樂的賞識。他多年來憑個人努力，終於得到觀眾認同，代表作是和萬綺雯合演的《我和殭屍有個約會》系列，至今仍為劇迷追捧，並成為昔日亞視的當家小生之一。

{{hket:inline-image name="04192002.jpg"}}{{/hket:inline-image}}

{{hket:inline-image name="04192001.jpg"}}{{/hket:inline-image}}

同場加映：360秒人生課堂丨林盛斌高EQ全靠人生經歷累積 豁達面對負評意外為仔女「打底」

{{hket:ul-video id="5606"}}{{/hket:ul-video}}

阿照這日接受港台節目《一起走過》主持楊紹鴻、寶珮如訪問，分享多年來在娛樂圈的小故事。對於當年被指派去主持兒童節目《500飛虎隊》，阿照笑說：「都有兇小朋友，真係好曳，我話再曳就『車』巴你，咁當然唔會打佢，只係嚇吓佢啫，知唔知我哋幾個人對住幾十個細路仔，有15個曳你就人都癲，有智慧都無用，一定要嚇一嚇佢先得。（畢業即入兒童組？）唔係，先拍咗《琴劍恩仇》，第二套就拍《武則天》，又無唔開心，初初就知道爆騷爆得好離譜，唔使擔心無錢，一年講梗爆幾百個騷…後期有監製搵我拍劇，咁去問王偉哥我而家咁樣應該點做，我喺兒童節目就唔使擔心交租同各樣問題，偉哥就話咁樣係啱㗎，但要記住兒童節目做得幾多年，當有日你大咗兒童節目唔要你，你再返出嚟做劇集會唔會遲咗啲，佢話咁提議叫我考慮吓，跟住我諗咗幾日就搵監製講我唔撈，因為我要過去拍《濟公傳》，後尾開始完全拍劇集…，唔知有無100套劇。」

尹天照手遊廣告向《殭屍》致敬 造型勁似況天佑：老闆都係殭迷【下一頁】

在亞視效力逾20年，阿照坦言有人搵過他傾跳槽，亞視雖然在本地電視台較弱勢，但大家工作是好開心，「我見識過TVB嘅制度，同佢哋啲藝人有傾過，係好分黨派同名次，分ABC Grade，我係接受唔到。我喺亞視做替身可以唔收錢，演員唔打得咪幫手打，嗰時拍《滿清十三皇朝》，監製話我喺珠海無戲份，但想我上去幫幫手，因為武師唔夠，睇吓我哋可唔可以替吓，咁我就問駱達華同吳廷燁有無興趣上去玩，不過就同監製講明要攞少少錢，替十個都要畀兩個錢，不過替身啲錢我哋係攞晒出嚟請全組人食飯。」

（↓點擊放大睇圖片↓）

阿照可謂同殭屍題材頗有緣，除有代表作《我和殭屍有個約會》外，同已故藝人林正英合作過《殭屍道長II》，曾被對方勸他做人不要太執著，「有次正英師傅話我好執著，好多嘢我話唔得要NG拍過，試過有場打戲拍咗30次，我自己要拍到好為止，拍到武術指導已經話得都要再嚟過。到喺佢屋企慶功宴嗰日，師傅飲大咗同我講數，話『你呢，真係要改改，唔使咁執著，有啲嘢出街無問題嘅』，我就答佢『師傅，你紅咗嘛，邊個唔識林正英，係人都知你係殭屍道長，我係邊個？我乜都唔係，梗係做到最好，畀觀眾睇到我打造一個新形象出嚟，搵到條出路』，佢就話唔係咁，我就堅持話係，你有你、我有我，一係飲杯，唔係我就走嘞。」他憶述當時孟海走過來，笑他就快激死師傅，指師傅其實很錫阿照，「其實做好自己有咩問題，最後師傅都投降，佢知道我做得好都係喺佢戲入面，我只係其中配角，但成個戲係好，咁就無問題。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】