恒生「減碳恒動」 為兩學校裝太陽能系統

保持低碳生活，可以為環保出一分力。黛安收到風，恒生銀行捐咗240萬元畀低碳想創坊，支持「減碳恒動--恒生低碳校園」。計劃喺今年底前，為兩所學校安裝140塊太陽能電板，預計每年可產生約8.2萬度電，相當於大約16個香港普通家庭估算嘅年度使用量。而且透過「上網電價」補貼政策，兩個太陽能系統預計每年仲可獲得約25萬元回贈，可支持學校推行氣候教育至2033年㖭，預期每年有超過4,000人包括師生同家長受惠。首間參與嘅學校就係天主教慈幼會伍少梅中學。

公關姊妹話，計劃除咗希望提高可再生能源嘅生產同使用以減少碳排放，亦希望透過喺學校推行氣候教育，令學生可持續喺關注氣候變化嘅環境中學習，增加對相關議題嘅認識，並啟發佢哋探索同實踐綠色生活。