海洋公園夥拍The Sandbox 進軍元宇宙NFT遊戲

近年好多人提出同質化代幣（NFT）同「元宇宙」概念，黛安收到風，海洋公園將同全球頂尖嘅去中心化遊戲虛擬世界The Sandbox合作，透過喺虛擬世界建立NFT資產同遊戲，為大家帶嚟破格嘅數碼娛樂體驗。

訪客體驗破格數碼娛樂

公關姊妹介紹，The Sandbox本身有同Adidas、The Walking Dead、雅達利同藍精靈等大型IP品牌合作，佢哋嘅「元宇宙」可為玩家同創作者提供一個去中心化且簡單易用嘅平台，為訪客帶嚟全新遊戲體驗之餘，又可安全儲存同交易作品。

海洋公園CEO黃嗣輝話，今次合作係公園其中一個創新項目，令公園以前所未有嘅方式，提供令人投入嘅體驗、活動和產品，期望喺The Sandbox元宇宙嘅虛擬世界創建公園嘅獨特內容同產品，並透過啟動「元宇宙」之旅，畀訪客享受新嘅歷險旅程，至於海洋公園同The Sandbox嘅合作內容，將會適時公布，黛安都好期待想知有咩新嘢玩啊。