迪士尼關愛毛孩 派義工協助動物庇護中心

噚日係國際狗狗日，可惜唔係每隻毛孩都可以獲得關愛。黛安聽公關姊妹講，香港迪士尼樂園度假區嘅迪士尼義工留意到被遺棄狗狗嘅需要，早前派出超過20個成員到訪元朗幾間動物庇護中心，幫手打掃同餵食，希望幫狗狗締造更好嘅生活環境。

黛安知道一眾義工都好落力，除咗喺大熱天時沖洗地板、幫狗籠換墊底報紙、將一個個狗狗水兜清洗乾淨外，仲推車仔帶行動不便嘅狗狗去散步，並幫佢哋洗白白。見到狗狗露出天使般嘅笑容，相信佢哋都感受到久違嘅人間溫暖，度過咗開心一天。

受助機構之一、阿棍屋負責人謝婉儀話，香港每年都有好多動物被遺棄，中心而家收容咗超過160隻動物，除咗狗狗，仲有大量貓貓、山羊、雀鳥同烏龜等，容量已經飽和，人手負擔更加係超負荷。佢話好多謝迪士尼派出義工隊，幫輕佢哋唔少，「阿棍屋得2個全職員工，仲有大量例行工作要做，本身以為天氣咁熱義工隊會怕辛苦，估唔到佢哋好落力，一項接一項咁完成工作，對小動物嘅愛同關心令我好感動。」