一田日本食品節 零食美酒水果樣樣齊

疫情下好多地方封關，姊妹們思日病發作點算？一田超市即日起至今個月29日舉行「春の茶屋」日本食品節，有多款限定櫻花零食美酒、茶屋和食料理、熊本直送物產，仲有日售8萬嘅盒京都男前豆腐等新品，黛安已約好姊妹去掃貨喇！

大家今年無緣外遊賞櫻，惟有揀啲櫻花系嘅零食「止渴」，中島大祥堂櫻花草莓味威化卷酸甜交織，津山屋櫻花菓子啫喱糖口感Q彈，伊華棉花糖粒粒櫻花花瓣形狀，打卡必備。

和風食材亦有好多花款，一田今次引入日本百年老字號，以長野縣天竜川地下水及上等靜岡產抹茶製成嘅櫻滿月抹茶烏冬；仲有日賣8萬盒嘅京都男前豆腐，配上信州自然王國士多啤梨沙律醬，食落好滋味㗎。

另外，仲有唔少來自熊本嘅靚水果，好似日本產量第一嘅熊本番茄、熊本安迪斯青肉蜜瓜，以及外形有趣且味道濃郁嘅熊本凸頭柑等。黛安推薦大家試下熊本甜熟熊紅士多啤梨，香甜又美味。