【進擊的新娘】超厚面皮新娘狂追同事畀人情 拍戲都拍唔到咁啜核

收到「紅色炸彈」的時候，人情當然走唔甩，但如果對象是一位唔熟的同事，去唔到飲仲不斷提你記得俾人情，你又會點做呢？近日有位「進擊的新娘」無論係結婚前定後，都出盡力「𢲷人情」，其厚面皮程度堪比拍戲都不如。

近日，一名網民於討論區發文，指公司一名女同事在未詢問過能否出席婚宴的情況下，便向全公司派帖，甚至連入職不足1個月的同事都不放過。從Whatsapp截屏所見，在派帖不久後，不論同事有沒有回覆、抑或已表明去唔到，該名女同事均在信息間「提醒」同事俾人情，連一名同事因白事而不能出席，她都依樣回覆「咁人情你方便先再俾我喇」。

「進擊的新娘」𢲷人情信息層出不窮，務求令你「記得」俾人情，逐張cap圖畀你睇：

（↓點擊圖片放大↓）

由於該名網民與其他同事須上班而無法出席，所以便一起夾份送禮，但最令人無語的是，這名新娘竟到商店查看禮物價錢，更致電店舖職員問張單幾多錢，以計算禮物總值多少，之後放上IG tag所有送禮的同事：「多謝19位同事同GW夾份送價值4千嘅BB禮物俾我」。

至於已離職的舊同事和很久沒見的朋友，進擊的新娘繼續發揮既有本色，在Whatsapp發動連環攻勢，甚至表示可用轉數快收禮金，更「溫馨提示」未俾人情的人：「帖入面有張餅卡㗎，記得用咗佢唔好放大耐」。以為結完婚就一天都光晒？錯！出post的網民表示這名新娘結完婚幾日後繼續向老闆𢲷人情，令人不得不五體投地。

一眾網民追post後，紛紛指新娘追人情「好鬼肉酸」、「究竟面皮有幾尺厚」，有的更留言「梗係答我嚟唔到呀，下次先」，甚至提議「將餅卡入返落利市封當人情俾返佢啦」。其實結婚請飲向來是件高興事，而且人情不外乎一份心意，為咗收人情搞到「眾叛親離」，兼俾網民公審，值得嗎？

編輯：梁銚玶

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/