亞洲神童張如城搞慈善音樂會 恩師讚足5分鐘:佢係一個英雄人物

現年33歲，有「亞洲神童」之稱嘅歌手張如城以騎呢作風出位，2001年以13歲之齡出道，其後離開樂壇繼續學業，到2008年「復出」，創作《友誼的光彩》支持北京奧運，但其獨特唱功、舞蹈為大家所「膜拜」。歌迷一直都好掛住佢，「念念不忘，必有迴響」，終於，如城喺失蹤咗幾年之後「載譽歸來」，趁住農曆新年前夕為香港打打氣，開《亞洲神童張如城慈善音樂會》咁話。

{{hket:inline-image name="9ba33d637f2b836e6ba20f5f086fbb37.jpg"}}{{/hket:inline-image}}

如城嘅慈善音樂會片段昨日首次曝光，無論造型、唱功同MV都保持住一貫水準，冇令粉絲失望！成條片片長約14分鐘，頭5分鐘由如城其中一位音樂老師讀出如城嘅威水史，抑揚頓挫、充滿感情，「佢係一位英雄人物，不怕網絡欺凌，不怕疫情……創作愛國愛港歌曲，每個字每個音帶著千軍萬馬……」搞到小編都有啲眼濕濕！

（↓點擊圖片放大↓）

如城一身紅噹噹，喺充滿中國特式嘅荔枝角公園獻唱飲歌《路上》同《中國巨龍》，雖然未能邀請歌迷出席音樂會，但即使solo都忘情演出！為咗應節，如城連咪stand都特意包上紅布，穿上火焰褲嘅佢大跳十字步，仲配合航拍令到大家可以鳥瞰亞洲神童嘅風采。片段中當中不時加插內地風景，每首歌都係配以十字步舞蹈，字幕配上火紅嘅微軟正黑體，老人家都啱睇呀！至於室內片段，特意加上金元寶作背景，甚至找來白面財神彈結他同彈琴，非常喜慶。

{{hket:youtube id="ws9nLkO_FCw"}}{{/hket:youtube}}

如城一如以往大曬語言天份，以兩文三語演出歌曲，充分展示佢嘅passion之餘又可以宏揚中國文化，大同世界都係靠佢創造！網民為佢喺討論區開post，以「亞洲神童張如城終於返嚟啦」為題，只係短短4個鐘已經有200個留言討論，話題性十足！唔少人都認為「香港樂壇欠張如城一個交代」，更覺得佢有機會爭奪來年嘅「最佳男歌手」獎，好多知音人呀！不過原本以為如城睽違多年會有新作面世，唔少人對於佢唱舊歌都表示有啲失望，但都會繼續支持佢咁話！

=====================

晴報MeWe 登場！https://mewe.com/p/skypost

健康男女MeWe 登場！ https://mewe.com/p/healthylifeexpress