十月初五的月光︳與石修相隔33年再合作鬥凍齡 米雪直接向薛家燕取經笑拍檔笨

由張智霖、佘詩曼、薛家燕及馬浚偉主演嘅經典劇集《十月初五的月光》（2000年）當年叫好又叫座，早前無綫落實翻拍，佘詩曼「君好」一角將由近年極速上位嘅何依婷（Regina）飾演，而「初哥哥」則由胡鴻鈞（Hubert）擔任。至於Q姨同全海景，就由經驗老到嘅米雪姐同石修擔任，日前四人為新劇試造型，珠玉在前，佢哋接受訪問時都話有啲壓力。

{{hket:inline-image name="tX-x2tlq5gIrqi4_ncKPa3OEM2LOoiCZPlT1pz5U9ac.jpg"}}{{/hket:inline-image}}

不過兩位大前輩都表示有留意胡鴻鈞同何依婷嘅表現，大讚佢哋有潛質，而米雪就話佢今次演Q姨呢個角色，直接向「前Q姨」家燕姐取經：「梗係啦（問家燕姐），我邊有佢咁蠢丫（指石修），仲要睇番，我直接問真人啦。」米雪指家燕姐同佢傳授完「Q姨」經之後仲同佢打氣，叫佢加油努力咁話。

而雖然石修經驗十足，但都要做足功課：「我知道觀眾對這部戲很期待，跟米雪合作既開心又緊張，今次係我哋第3次合作。」

（↓點擊圖片放大↓）

翻查資料，原來二人早喺1979年已經合作拍過電視劇《絕代雙驕》。當年石修演花無缺，同米雪飾演嘅蘇櫻雖然唔係一對，但都有唔少對手戲。到1987年二人再於《少林與詠春》中合演，終於有感情線；相隔33年石修再於《十月初五的月光》中「迷戀」米雪，相信二人一定默契十足，演起感情戲上嚟駕輕就熟。網民大讚二人除咗「感情不變」之外，連外形都冇乜變化，可以話係圈中最「防腐」嘅凍齡男神同女神。

撰文：黃蘊姿