講起甄子丹，你會諗到啲咩？一要打十個？凌空180度穿心腿？其實丹爺除咗打得之外，佢都有文靜嘅一面，原來丹爺好細個除咗學武術之外，同時亦都有學鋼琴，仲考到去第十級，不過後來佢要喺鋼琴同武術之間二揀一，最後丹爺揀咗功夫，如果唔係佢依家應該係「爆肌鋼琴王子」。
如果丹爺繼續學琴，佢應該世界上最爆肌嘅鋼琴王子。（甄子丹微博）
日前甄子丹喺微博上載咗一條短片，短片開頭丹爺準備幫寶劍出鞘，不過未出晒就變番入鞘，跟住丹爺就用國語講：「今天不玩這個，玩這個！」之後鏡頭一轉就見到丹爺坐喺鋼琴前開始彈奏，全程有板有眼，完全係演奏級水平，唔少網友都大讚丹爺真係文武雙全。
（甄子丹微博）
網友激讚。（甄子丹微博）
棍下出高手
原來丹爺父母都係音樂中人，父親會演奏小提琴及二胡，而母親就唱女高音兼習武。丹爺喺一次訪問中講過，佢從小就因為父親而學習鋼琴，因為母親而習武，結果就係鋼琴彈得唔好，父親會木棍侍候；武術打得唔好，就輪到母親木棍侍候，所以佢今日文武雙全，絕對係「棍下出高手」。到丹爺十幾歲時候，就因為唔可以分心而要二選一，雖然丹爺已經考到鋼琴第十級，但最後佢都係選擇咗練武，先至有今時今日嘅「宇宙最強」地位。
（甄子丹facebook）
一技傍身世界通行
其實好多藝人除咗演得唱得之外，當中唔少都才藝橫溢，正所謂「一技傍身，世界通行」，多幾樣才藝跟身就可能多好多工作機會，始終機會係留畀有準備的人嘅。
周慧敏 油畫
早已半退出娛樂圈嘅周慧敏，自小就好有畫畫天份，只不過後來入咗娛樂圈先至放低畫畫，直至佢半退出後，終於再次畫畫，早前佢仲開個人畫展，展出嘅作品真係唔係講笑，絕對有大師級水準。
（東星娛樂）
周慧敏作品（網上圖片）
周慧敏作品（網上圖片）
李思欣 珠寶鑑證
本來一直只喜愛鑽石嘅李思欣，因為年前同朋友夾份開鑽石店，加上自己對鑽石、寶石好有興趣，於是因利成便去學鑽石鑑證，雖然未去到專家級數，不過要分真假同係咪靚鑽石，就走唔出佢法眼。
（李思欣 Facebook圖片）
陳慧琳 珠寶設計
自小就鍾意畫畫嘅陳慧琳，紐約求學時期已經學過首飾設計，直至加入娛樂圈之後，佢為自己代言嘅珠寶店設計珠寶首飾，設計獨特精美，當時唔少人都專登去買Kelly設計嘅手飾，成為珠寶店生招牌之一。
（東星娛樂）
徐錦江 雕塑、國畫、書法
一向形象粗豪嘅徐錦江，本身生於醫學世家，自小就對畫畫有興趣，所以入讀廣州美術學院，師承已故嶺南派國畫大師關山月。佢懂得雕塑、國畫、設計、書法等等，作品更加揚威海外。
（徐錦江微博）
撰文：倪少軒