湯鎮業擁有6個仔女，佢同首任老婆姜坤育有大女湯愛嘉同一對孖仔湯君慈、湯君耀，依家孖仔已經25歲，遺傳咗父母優良基因，一樣咁高大靚仔有型，同TVB五虎時代嗰陣嘅湯鎮業撞樣。佢哋仲好有生意頭腦，喺疫市開舖做老闆，生意唔錯。
(湯君慈、湯君耀instagram圖片)
湯君慈、湯君耀早喺6月中已經斥資6位數喺旺角開咗間凍肉店，近日佢哋不時喺社交平台宣傳生意。除咗凍肉，舖頭仲有賣海鮮、氣炸食品、甜品、水餃。啲水餃係湯媽媽親手包嘅招牌貨，每日新鮮製造，限量發售。做老闆當然要親力親為，從孖仔上載社交平台嘅相片可見，佢哋曾經去過銅鑼灣超市做推廣，當時堂家姐湯洛雯都有幫佢哋宣傳，成功吸引唔少客人排長龍入貨。
(湯君慈、湯君耀instagram圖片)
(湯洛雯instagram動態截圖)
湯君慈、湯君耀曾就讀美國加州大學洛杉機分校，主修社會經濟學，副修電影。讀書時，孖仔憑住靚仔樣同6尺高嘅model身形，經常受到唔少著名品牌青睞，獲邀出席晚會及拍攝時裝廣告，收入不錯。畢業後，佢哋隨即同「宇宙最強」甄子丹間公司簽約，正式進軍娛樂圈，曾經拍過電影《大師兄》。一心想喺演藝圈長遠發展嘅「大孖」湯君慈話想試多啲演戲，講明做咩角色都得，就算要學彭于晏為藝術犧牲，背部全裸，佢都冇問題。
(湯君慈、湯君耀instagram圖片)
(《大師兄》電影截圖)
孖仔年紀輕輕就已經出嚟做生意，佢哋仲會去舖頭落手落腳執貨、派傳單，唔怕熱同曬，原來佢哋咁捱得，係全靠爸爸湯鎮業嚴厲嘅教學方法。湯鎮業曾喺訪問講過做女仔唔使太叻，最重要嫁到好老公；但做仔就要學識獨立處事、有責任感，所以佢一直嚴格教育孖仔，要佢哋經歷挫折，靠自己出人頭地。
(湯君慈、湯君耀instagram圖片)
{{hket:inline-image name="24.jpg"}}{{/hket:inline-image}}
(電視截圖)
自從湯鎮業同姜坤離婚，3父子就生活於同一屋簷下，孖仔形容湯鎮業係個要求多多嘅爸爸，成日要佢哋執屋、唔准開太耐冷氣。而且佢哋曾上大陸綜藝節目大爆爸爸形象嚴肅，唔鍾意講笑，仲成日鬧佢哋，幾乎冇讚過佢哋：「我們小時候成績不好時，他都會拿藤條打我們。」「細孖」湯君耀話試過被爸爸趕出門口，最後喺街上流浪咗幾個鐘：「他把我趕出家門，結果我在街上等了幾個小時，等他晚上睡了以後我才敢回家。」
(電視截圖)
{{hket:inline-image name="23.jpg"}}{{/hket:inline-image}}
(電視截圖)
雖然孖仔曾經覺得爸爸好煩，不過當佢哋長大後要出國讀書，生活大小事都要靠自己解決，終明白爸爸以前咁做都係出自一片苦心，想佢哋喺刻苦嘅環境磨練下。孖仔亦讚爸爸以身作則，會陪佢哋逼巴士、逼地鐵，亦都會帶佢哋食大排檔、快餐店，等佢哋學識節儉。
(湯君慈、湯君耀instagram圖片)
{{hket:inline-image name="15.jpg"}}{{/hket:inline-image}}
(湯君慈、湯君耀instagram圖片)
撰文：張芷晴
責任編輯：楊安莉