重要角色慘遭毒手 湯鎮業：我殺咗佢

TVB新劇《荷里活有個大老千》播出以來迴響不俗，當中女主角王子涵與文凱玲更成功彈起，不過講到最搶鏡的始終離不開兩大好戲之人鄭則士與湯鎮業莫屬，兩人一正一邪，每次交手都火花不絕。

當中飾演華探長的湯鎮業更可謂奸到出汁，近日他接受內地傳媒訪問，驚爆呢位華探長「文雄」將會走火入魔，事關當初他以鄭則士性命作威脅，逼張慧儀移情別戀成為其姨太太，但嚟緊佢竟發現張慧儀與鄭則士仍有聯絡，令他怒不可遏：「我唔止下令追殺龍四（鄭則士角色），我咁愛百合（張慧儀角色），但佢竟然出賣我，紅杏出牆，於是我殺咗佢，的確係比較冷血，但都係因為因愛成恨。」

{{hket:inline-image name="HT.jpg"}}{{/hket:inline-image}}

TVB電視截圖

笑吳業坤外表一般

而對於今次與咁多後輩合作，湯鎮業就透露鄭則仕做咗阿Sir：「如果有其他新人同場，鄭則仕會比較嚴厲，佢會教新人點去演戲。我覺得無綫呢班新人都好聽話，亦很用心，如果呢部戲喺內地拍，人哋啲演員係唔會理你，香港嘅後輩比較謙虛，同很接受前輩指導。」不過講到吳業坤原來喺TVB幾紅，湯鎮業就顯得有點驚訝：「我唔知呀，真係好紅？睇佢外表一般，哈哈！」

講到外表，從當年外貌冠絕五虎，到如今大多飾演奸角，在旁人眼中好似降呢，但湯鎮業卻樂在其中：「如果做到苗僑偉、劉德華咁，繼續當小生，一定要保持最佳狀態，比如我吃一碗麵，佢哋只能吃三分一碗，因為要keep住樣貌同狀態，講真我到呢個年紀，唔想咁辛苦。」果然係奸得有道理。