【職場性騷擾】北上公幹高層向女同事飲品加料 女子好意提醒被炒：真係好恐怖

職場性騷擾問題時有所聞，Facebook專頁「辦公室日報」的版主聶瞳近日就大談職場性騷擾，甚至近乎侵性犯的個案，指曾有一名女士在北上公幹時，目擊有高層向一位女同事的飲品「加料」後出聲揭穿對方而被解僱。而當時有另一名目擊的女同事竟認為「應該只是玩玩」，更令她感到嘔心。

在獵頭公司工作的聶瞳指出，求職者Helen遇到的事，是他聽過最恐怖的「職場性騷擾／性侵犯」例子。Helen上一分工作經常要北上公幹，有次在內地應酬時，「席間啲人係咁劈酒，有高層趁一個女仔行開咗，滴咗啲嘢落女仔個杯度，Helen見到就問係咩嚟？高層冇答，直接行開，然後Helen問身邊另外兩位國內女同事睇唔睇到？」

未料，兩名女同事竟然支吾以對，「佢（Helen）急起上嚟發火：『如果係落藥迷姦咁點呀？』其中一個女同事竟然話：『應該只是玩玩。』」受害女同事返回座位後，Helen立即跟她說明一切，並拉著對方離開；期間，她不斷叫對方報公安，惟對方不肯，「話唔想搞大件事」。

Helen本來第二日打算與老闆一起質問涉事高層，未料對方先下手為強，她一回公司就已被解僱。不過，疑似被落藥的女同事則相安無事，Helen擔心對方會出事，提議辭職一齊走，但被對方以「想睇定啲先」為由拒絕，「淨係記得Helen講咗句：『雖然我又老又醜，班高層唔會搞我，不過見到呢啲情況真係好恐怖，最嘔心係有女同事見到唔出聲，女人竟然唔幫返女人，所以我而家先至reject晒所有要返大陸嘅offer，寧願搵少啲都要留喺香港。』」

另外，聶瞳與弟弟又拍片分享其他職場性騷擾個案，其中弟弟更曾有一名「想成為每個女仔嘅男朋友」的男同事，除了曾偷看女同事的Facebook談話記錄，「睇吓佢同邊啲男仔溝通」外，更曾偷偷尾隨另一名女同事放工，看到對方上的士後更跳上車，嚇得對方花容失色，十分誇張。

聶瞳與弟弟分享其他職場性騷擾個案：

{{hket:youtube id="wVwg46s59OE"}}{{/hket:youtube}}

撰文：李凱晴