特色手雕麻將登陸柴灣青年廣場

每逢農曆新年，黛安媽咪都會抹乾淨佢副手雕麻將同親友打番幾圈。家陣要喺香港搵副手雕麻將都唔係咁易，由切割、打磨、雕刻到上色，每個步驟都匠心獨運，每隻麻將都係師傅心機之作，由機器大量製作嘅麻將根本無得比。

最近黛安就去咗柴灣青年廣場舉行緊嘅「與『雀』同遊」展覽，同負責今次展覽嘅插畫師Karen傾過，原來佢家族本身經營麻將廠，佢爺爺60年代喺屋企創立呢門生意，後來Karen爸爸接手，80年代擴張業務，喺九龍灣設廠，成為本港兩大龍頭廠房之一，當時全港一半麻將館都由佢哋供貨；可惜後來工業式微，麻將廠最終不敵內地低成本競爭，遂於2009年結業。

呢幾年，孝順女Karen特登搵番當年經營麻將廠嘅資料，用插畫記錄昔日趣事；又請爸爸「出山」，與印刷廠合推一系列設計新穎、深具本土特色嘅麻將精品，希望傳承麻將工藝。

聽Karen爸爸張誠忠師傅話，囡囡之前喺PMQ搞展覽好多人參觀，有外國人睇完仲專程搵張師傅訂造手雕麻將，事後仲留言大讚佢手藝精湛，令佢好有滿足感。