聖誕頌歌節改形式 續為清貧少年籌善款

話咁快已經嚟到12月中！但除慶祝佳節之外，都唔好忘記做善事！黛安知道，「兒童發展配對基金」10年嚟都有用民間身份，每年為清貧青少年提供儲蓄配對金，累積資助超過5,600名青少年，今年繼續舉辦旗艦活動「聖誕頌歌節」為配對金籌款，自今個月8號揭幕以來，已舉辦近百場公開頌歌表演！

但公關姊妹同黛安分享，受今年社會氣氛影響，唔少商場取消咗公開表演活動，令參加「聖誕頌歌節」嘅團體少咗公開頌歌籌款嘅機會，但大家仍然熱情滿滿，又響應參加網上舉辦嘅聖誕頌歌比賽，將唱歌片放上fb。「亞太女企業家協會」上星期一仲去到中環蘭桂坊舉行慈善義賣手袋活動，短短一個鐘就已為大會籌得近18萬，全數用作100名基層青少年嘅配對儲蓄金，認真有創意又有心！

黛安仲知道，為慶祝活動10周年，基金嚟緊星期四（19日）仲會喺IFC舉行「感謝祭」，感謝一班長期支持基金、為清貧青少年籌款嘅善長、義工、政府官員等。大家到時記住一齊參與呀！