吳浩康(Deep)尋日到電台接受訪問時,仲話聖誕節要同女友崔碧珈夾放假慶祝,話視女友為結婚對象嘅佢仲非常「入屋」,連崔碧珈媽媽都會煲湯畀佢飲。但佢就話唔會公開喺演唱會求婚,以免好似「逼人上轎」咁。不過,正當大家都以為佢好事近,點知原來兩人情已斷,再唔會一齊過聖誕節!
(東星娛樂)
性感女神崔碧珈今年4月被爆喺年初朋友聚會中撻着36歲嘅吳浩康Deep,一向愛得高調嘅Deep稱怕戀情見光死,開始時二人都否認拍拖,直到9月崔碧珈疑情緒病復發嗌分手,Deep先派發定心丸認愛,Deep有感自己工作唔定時,少時間陪女友。但話已戒夜蒲同亂識女仔嘅陋習,亦想安頓落嚟。
(網上圖片)
不過尋晚崔碧珈突然上載一張公路相配上文字:「從來都把感情看得很重,認為兩個人相處要互相包容,而不是要改變對方,如不,離開可能是一個新的開始。 2020年大家一齊加油。」似乎暗示同男友因未能互相包容而分手。
(崔碧珈IG)
而今早Deep亦喺社交網承認與崔碧珈分手:「感恩和你一起的時間,我會好好珍惜亦有一件(段)非常難忘的記憶,喺呢段時間裏面,可能我未能夠盡一個好男朋友的本份,因為我放了太多時間於工作而忽略了你,亦自知有不足,而不配為你的男朋友,我相信如果當我能有能力照顧好你之時,男人必需要有事業有能力,希望日後我有能力的時候,可以有緣和你再一起走,照顧好你,我衷心祝福你。」
(吳浩康IG)
自Deep發表分手宣言後,崔碧珈再發ig story,佢寫道:「扮上進,又講大話?」仲tag埋Deep個名,似乎崔碧珈唔接受Deep嘅分手理由,不過冇幾耐崔碧珈就又再Delete咗Story。
(崔碧珈IG)
Deep多年嚟身邊女伴都車輪轉,2004年,吳浩康同視后胡定欣戀情公開,雖然Deep事業受挫,但女方依然不離不棄,但有指男方移情別戀搭上「拿督女」莊思敏,最終結束兩年情!孿都變直嘅莊思敏同吳浩康愛得高調,不時公開拍拖出席活動,但拍拖5年2011年宣布分手,雖然莊思敏就話唔關第三者時,但就承認係佢飛對方!
胡定欣(東星娛樂)
莊思敏(東星娛樂)
到2013年,吳浩康撻着師妹鍾舒漫(Sherman),拍拖兩年幾後仲到談婚論嫁階段,但突然爆出男方「偷食」,最後又係分手收場!直至2018年底,兩人忘掉過去相約露營,再見亦是朋友,今年初講到「翻撻」話題時,兩人都冇打斷後路!
吳浩康與鍾舒漫(東星娛樂)
而喺近呢幾年間,吳浩康就曾戀上有米女友李昭南(Michelle),Michelle來頭唔少嘢,曾獲選為「全美華埠小姐」第二公主,唔只樣靚身材正,仲有高學歷,現時喺ViuTV做主持工作!不過喺2018年5月,二人喺社交網宣布「分道揚鑣」,兩年情玩完,不過阿Deep當時喺文中就表示「心中仍然很愛她」!
吳浩康與李昭南(網上圖片)
撰文: 黃蘊姿