渣馬10公里輪椅賽用全新路段 鼓勵傷健人士齊參賽

港人每年必跑嘅渣打馬拉松，下個月18號開始接受報名喇！黛安知道，大會今屆首次試行「傷健人士名額」制，將預留500個名額畀傷健人士，抽籤亦會同公眾分開，增加傷健人士出賽10公里、半馬或全馬賽事嘅機會；而大會仲安排領跑員喺抽籤後先報名，視障人士就唔使擔心領跑員會唔中籤，有關安排好貼心啊。

要達到傷健共融，一條細心嘅賽道都好重要。聽公關姊妹講，今年10公里輪椅賽就會採用全新跑綫，由灣仔運動場起步，經杜老誌道往龍和道，並喺龍和道與添華道之間繞兩個圈，最後就會喺維多利亞公園衝綫，成條賽道更加平坦，參賽者自然更易爭取佳績；今屆參賽時限仲由50分鐘增至65分鐘，兼可用一般手動競賽輪椅參賽。

公關姊妹仲話，留意到好多人都鍾情參與「家庭跑」，所以決定推出全新嘅賽規，歡迎一家大細、或者三五知己組隊齊齊跑800米賽事，每隊限2至4人參加。而家庭跑賽事會比主賽事早一日舉行（即明年2月8日），並會用維園嘅衝綫區做起點同終點，打卡夠晒氣氛。

至於最多人想參加嘅全馬賽事，今年名額會再加1,500個，總共可畀2.4萬個健兒一齊作賽；主要賽事總名額夾埋有成7.4萬個，相信可以滿足到各位跑步健兒了，報名詳情可以去www.hkmarathon.com查詢同瀏覽。