診所姑娘找錯錢憂醫生責罵 小朋友主動作證求情：唔好鬧佢

小朋友往往是最誠實的，大人有時也自愧不如。有診所護士日前不慎向一名男病人找多了100元，惟即時發覺出錯後，對方竟加以否認，並立即轉身快速離開。診所內一名見義勇為的小朋友目擊事發經過，便主動向醫生求情，希望不要怪責該姑娘，令眾人大為感動。

男病人否認多收款項兼快速離開

診所護士「珍寶豬」今日於其Facebook專頁「診所低能奇觀」發文分享，指其同事發現找多了100元給病人後，立即叫停「好快就轉身準備離開」的男病人，「先生，你嗰度係咪多咗張100蚊紙呀？」未料，對方聽罷竟「加快兩步」，頭也不回地回應：「冇呀。」

當時，一對坐近門口的母子望望該名男病人，眾人隨後目送了他離開。「點算呀？佢就咁走咗，我應該係找多咗錢畀佢㗎！」珍寶豬的同事其後再次數清楚，確認找多了100元給男病人，「佢肯定唔會還返畀我啦……」

小朋友向醫生求情：唔好鬧佢

此時，該對母子入房見醫生，出來後該名母親著兒子「唔好咁多事啦你，人哋啲嘢關你咩事啫」，

醫生行出嚟問同事：「頭先你找多咗錢畀人呀？」

同事：「......係呀，100蚊呀」

同事望住我，以為係我講畀醫生知，我擰頭表示都唔知點解醫生知。

醫生：「頭先睇嗰個細路喺度講，佢話佢自己係目擊證人，叫我唔好鬧你，係急急腳走嗰個叔叔有古怪。打得通佢電話嘅就同佢講，我哋有閉路電視啦。」

小朋友，多謝你呀，我同事以後找錢都會小心啲㗎啦～

網民大讚小朋友見義勇為

此事引來網民熱議，不少人大讚小朋友見義勇為，「小朋友真係好簡單……小朋友識是非黑白真係好重要，仲要敢言、助人」、「小朋友比大人誠實」、「小朋友做得好……嗰位先生……$100……就睇到咩人格」、「小朋友有良知又好憐憫的心，值得一讚」、「勇敢嘅小朋友，希望長大仍然有呢顆勇敢正義嘅心！」