【老父少子的悲歌】與7旬父診所鬧交 小學生遭摑：年紀大唔好生我

老父少子所面對的問題，非外人所能想像。有網民日前在診所目擊令人心痛一幕，一名年約70歲的老翁與大約就讀小學3年級的兒子爭執，期間兒子說出「你年紀大就唔好生我出嚟啦」，即換來老父當眾掌摑。對此，不少網民大為同情：「咁嘅家庭環境下長大，第時或多或少都會有心理缺陷。」

小學生：冇同學要帶老竇覆診

樓主周日（5日）在網上論壇「高登」以「真人真事，今日係診所見到對好絕望嘅父子」為題發帖，指當日在一間診所內看到一對老父少子爭執，「老竇大約70歲，腰唔直，視力有問題；仔得半度門咁上下高，最多小3」。他引述了兩人對話：

老竇：仔，醫生啱啱話幾時覆診吖？

阿仔：咪講咗下星期囉，張卡都有寫

老竇：你記得帶老竇返嚟，老竇唔識路

阿仔：唔識咪問人囉

老竇：唉，你個HXHX仔都養唔X熟嘅！叫你做少少嘢都唔得！

阿仔：啲同學仔係同爸爸去玩，邊有人要帶老竇覆診㗎

老竇：咁你老竇年紀大吖嘛

阿仔：你年紀大就唔好生我出嚟啦！

小學生被老父掌摑

樓主續指，該名老父聽到後，立即當場一把掌「車咗埋去」；至於兒子則十分委屈，「小朋友強忍住淚水，拎完藥就走，唔等老竇。」其後，他又留言進一步表示，「個仔看破紅塵……寧願兩母子生活好過」；如果與老父生活，「只會對小朋友發展更差」。

網民：扼殺小朋友成世幸福

此事引來網民熱議，不少網民十分同情該名兒子的狀況，認為老父十分自私，「害人成世，扼殺咗一個小朋友成世嘅幸福」、「唔會有童年，如果佢X母唔識教嘅話，個細路唔會有將來」、「咁嘅家庭環境下長大，第時或多或少都會有心理缺陷」、「除非佢老竇係中產以上有學識有錢，如果唔係真係幾慘」。

有網民認為情況不算壞

另有網民表示感同身受，「我同個老嘢都差左50年，真係成日諗點解人地老竇咁後生又賺得到錢同啲囝囡享受生活，而我就由細到大都要同佢出入醫院」。不過，亦有網民嘲諷此情況其實不算壞，「這才是最好的情況，一大一細，2個都冇嘢做，有綜援，又有公屋。到個仔20歲，出來做嘢，老的都應該個頭近。咁～即係捱幾年，個仔就有間屋住，又不用畀家用。」