改變中秋節日送禮文化 食德好推動回收惠及社區

中秋應節會食月餅，但好多時都食剩。黛安知道，食物回收組織食德好去年就回收咗8萬個月餅，噚日佢哋發布今年7月至8月做嘅一個針對30間企業、以及257個家庭送月餅行為調查，發現一個家庭去年平均食剩2.9個月餅，比前年2.27個高出近3成，推算去年香港人食剩的月餅，超過290萬個咁多！

接受食德好訪問嘅257個家庭方面，近5成人去年有食剩月餅；至於受訪個30間機構，有17個會送超過2,500盒月餅畀員工，即超過1萬個月餅。而喺調查入面，有超過一半機構表示，唔想收到合作夥伴送嘅月餅，更無一間企業表示想收到。而食德好就希望改變企業嘅節日送禮文化，做到源頭減廢。

逾250個團體簽惜食約章

食德好項目主任（教育）吳嘉晉話，去年回收嘅8萬個月餅，有8至9成係嚟自生產商，估計因為整得太多賣唔晒。而食德好連續5年推「有營過中秋」惜食約章，鼓勵各界企業同團體承諾今年唔送月餅畀客戶夥伴，或先問佢地想唔想收再送，依家已有超過250間企業或公營團體等簽署。

另外，食德好亦會喺中秋期間設立超過150個屋苑、商場同商廈月餅回收點，鼓勵大家喺節日前捐出食唔晒嘅月餅，等義工送畀有需要家庭。

月餅回收行動

時間︰2019年8月30日至9月12日

地點︰全港18區150個回收站30個為主要公眾回收站，如新城市廣場、世貿中心等