逾300長者 數碼港體驗電競樂

電競係近年嘅大熱潮，除咗後生仔之外，長者都要跟上潮流！黛安聽公關姊妹講，數碼港日前同善寧會合作，搞咗一個「樂齡電競及體驗日」，向長者推廣電競，72位老人家仲齊齊組隊進行FIFA足球電競對決，爭奪全場總冠軍，果然係寶刀未老，好有活力啊！

黛安知道，「樂齡電競及體驗日」前日舉行時，超過300個老人家參與，除咗部分人組成36支隊伍，利用數碼港全新電競場地嘅先進設施進行對決之外，部分人仲可以享受場內以特大超高清屏幕，同國際級音響配置嘅環境下，欣賞緊張刺激嘅電競賽事；現場亦設有體驗專區，等參與者試玩虛擬實境（VR）遊戲，同埋以香港旅遊為主題嘅遊戲等。

數碼港行政總裁任景信同黛安分享，佢哋致力推廣電競背後不同科技嘅應用，希望透過體驗，畀老人家感受電競嘅樂趣；仲希望通過收集長者參與電競活動時產生嘅大數據，再加以分析，用作提升樂齡護理康健服務質素，真係好有意義。