楊潤雄勉勵年輕人 不同人長處有別 多認識自己優點

黛安好喜歡睇賽馬會出版嘅《駿步人生》，最新一期封面人物係教育局局長楊潤雄，佢喺訪問裏面講咗唔少青蔥歲月故事，令黛安都獲益不少。

楊局長話，佢細個時因為「多口」試過畀老師罰打手板，仲要記過同見家長。不過佢自細就知要努力讀書，覺得自己唔係叻過其他同學，所以會用好多時間去學習。升中後入讀九龍華仁書院，教識佢每個人都有自己嘅長處。佢就覺得，有人讀書叻、有人打波叻、有人搞活動叻，有人就擅長做領袖，就好似社會上唔同人有唔同長處。

那些年雖未有DSE，但面對公開試放榜，考生嘅心情同樣緊張，楊局長都話當時多數搵朋友傾計減壓，「分散自己注意力，捱到第二日就去攞成績表。」佢覺得考試雖然壓力大，但唔係完全無參考價值，佢仲話成績代表你某年某月某日喺一些事上嘅表現，成績好與壞，對前途有影響，但唔係決定每個人嘅未來。

講到大學揀科時，楊局長都有苦惱過，佢提到教育局近年推動嘅生涯規劃教育，可幫到年輕人提早準備，佢感覺時下嘅年輕人視野更闊，比上一代人更成熟，不過資訊多，面對不確定因素更多，競爭亦都更大。

最後講到公職生涯，原來佢曾經兩次投考政務主任，第一次考完筆試後，連面試機會都無。後來佢去咗澳洲工作，咁啱遇到港府喺澳洲招聘政務主任，所以就試下，最後成功考到。佢話身為政務主任時，最鍾意係擔任民政專員做地區工作，記得沙士期間，搞地區清潔工作，見證一條街由污糟到乾淨，係好實際嘅改變。