單親媽任由男友餵1歲女食醉雞 友人看不過眼力數疏忽照顧3宗罪

為人父母者，好應負責任妥善照顧年幼子女。惟一名單親媽媽卻貪於玩樂，不但止未有好好照顧1歲女兒，而且更任由男友餵女兒食醉雞，令年幼女兒醉倒不適嘔吐。但該名媽媽不覺有問題，竟在Instagram的限時動態中以取笑女兒的口吻分享此事。其友人看不過眼，遂在網上力數該名媽媽3宗罪，大罵道：「佢唔生好過生！」

友人力數3宗罪

該名友人以「Lau」為名向Facebook群組「生仔要考牌系列」投稿，指該名單親媽媽自以為自己好偉大，「佢畀前度搞大完個肚，人哋唔要佢，佢就話要做單親媽媽。」他認為，做單親媽媽不是問題，問題在於她不負責任的態度。由於看不過眼，他因此在文中力數對方3宗罪：

1. 成日見到佢個女成凌晨4-5點都唔瞓

2. 仲要唔買玩具畀佢個女玩，佢個女得1個波玩都勁開心

3. 有時仲要畀佢啲fd（未結婚未有小朋友）湊2、3日，佢個女嗰時仲要得幾個月人仔，點解可以咁放心畀人湊？？自己經常去打麻雀去飲酒，跟住自己又喺IG打話好掛住個女，但又成日喺fb問有無人想拎佢個女去玩幾日

{{hket:inline-image name="bb210620191.png"}}{{/hket:inline-image}}

單親媽任由男友餵女兒食醉雞

而令他最憤怒的是，他日前在該名單親媽媽的IG限時動態中，竟然看到對方分享男友偷偷餵女兒食醉雞的「趣事」，對方更指「BB瞓咗陣醒返醉咗，笑死我，又嘔又行唔到直線成塊面紅晒」。對此，他不禁大罵道：

「相中係佢現任，點解可以偷偷地俾醉雞佢食？佢個女而家應該未夠2歲，佢仲要打『又嘔又面紅又行唔到直線』，跟住仲要話笑死佢？唔係應該擔心先㗎咩？咁都可以放上IG？佢唔生好過生，生完個女出嚟又唔照顧佢，周圍搵人湊，個女晚晚凌晨都唔瞓，仲要有時喺IG錄片用粗口鬧個女。」

網民認為事態嚴重應報警

此事引來一眾網民嘩然，不少人紛留言炮轟該名單親媽媽有問題，認為事態十分嚴重，應報警處理，「如果真係餵佢飲酒，對佢腦部發育有好大影響」、「救救小朋友，報警啦！睇佢現任都唔多正常，好擔心個小妹妹」、「呢件事其實好嚴重，你最好就cap低晒啲IG story同post（有片更好），然後報社會福利署同報警，因為好明顯係child abuse（both身體同精神虐待）case」、「求版主不要只放上網任人聲討，對小朋友一啲幫助都冇。咁多網友表明喺專業人士可以幫助，請盡快救小朋友。」

小朋友飲酒傷肝又傷腦

有醫生曾指出，小朋友肝臟仍未發育成熟，肝解毒能力相對較差；如果飲酒的話，可能會損傷肝，一旦過量甚至會導致昏迷等嚴重症狀。幼童飲酒傷害更大，嚴重的話更會影響腦部發育。