藝人林子聰（暱稱「肥仔聰」）當年憑周星馳電影《少林足球》六師弟的「輕功水上飄」爆紅，其後殺入娛樂圈，近年發展得不錯，曾為票房大收的電影《美人魚》擔任執行導演。肥仔聰同太太Christy於2012年結婚，婚後育有一子。去年太太再懷孕佗B女，肥仔聰榮升第二任老豆，一仔一女湊成一個「好」字。原先應該係喜慶事，不過佢直言呢次太太懷孕到生產的過程，幾度令佢崩潰，身心俱疲⋯
(肥仔聰Facebook圖片)
尋日肥仔聰太太生日，一家人四口影相，肥仔聰感嘆：「齊齊整整，已經足夠」。
(肥仔聰Facebook圖片)
肥仔聰老婆Christy今次懷孕，產檢時已知比較麻煩，因為檢查到有「植入性胎盤」，孕婦生嘅時候有機會大量出血，非常危險。今年1月太太不過懷孕6個月，但突然腹痛，肥仔聰感覺不尋常，馬上叫救護車，不過老婆已經等唔切，喺救護車上生咗，驚到肥仔聰腳都震埋：「BB出嚟得兩個手掌咁大，我已經唔係好敢望，因為唔知望呢一下，可能已經係最後一面。老婆嗰時又要狂岀血，嚇到個救護員都大叫開車。」
(肥仔聰Facebook圖片)
到咗醫院，因為老婆失血過多，需即時輸11包血搶救，心臟更一度停頓1分鐘。至於BB出生時僅得1.9磅，器官未完全發育，要全身插喉急救，並輸了3包血，母女情況一度極之危殆，在7位醫生急救下，太太搶救5小時，最後要切除子宮，先可以脫離危險期，而BB則要插喉及住保溫箱保命。阿女岀世時得1.9磅，心肺仍然未發展過，要等到夠4磅，醫生先批淮肥仔聰兩公婆接觸BB。肥仔聰喺老婆面前表現鎮定，一返到屋企就忍唔住崩潰爆喊：「返到屋企真係失控，差少少就無咗老婆同個女，諗到咁真係好難受。當時深深感受到老婆喺我隔籬，已經係福氣。」
(肥仔聰Facebook圖片)
當時肥仔聰一度停工，全力照顧妻女，太太住院10日，但阿女足足住咗3個月醫院，期間佢日日到醫院照顧，絕不假手於人。阿女早產，喺醫院經歷好多難關，同死神多次擦身而過。肥仔聰說：「個女喺醫院試過腦出血，又腹脹飲唔到奶，原本要開刀，將營養液注入腸道，但我唔希望佢受呢啲苦，睇見佢真係好心痛，心情好崩潰。我不停握住佢隻手，同佢講：『女呀，乖乖哋食嘢啦！』佢好似聽到我講咁，真係慢慢又可以食番，最終可以唔使開刀。」幸好BB經醫護人員悉心照顧下，今年4月已出院，喺屋企又有肥仔聰夫婦細心照顧，阿女而家有10磅重，又健健康康，肥仔聰一家可算雨過天晴！
(阿女係醫院住咗好長的時間,肥仔聰Facebook圖片)
(一家四口平安最緊要,肥仔聰Facebook圖片)