【逃犯條例】清場射超過150枚催淚彈拉11人 盧偉聰：太危急或會先開槍再警告【8大Q&A】

《逃犯條例》修例觸發佔領行動，警方昨日開槍清場，警民爆發流血衝突，警方被各界質疑濫用武力及對記者態度惡劣等，警務處處長盧偉聰今日下午會見記者，指行動中共拘捕11人，並回應以下8大Q&A：

1. 行動中發射子彈數字

盧指暫時未有具體數字，但約為150枚催淚彈、20枚布袋彈及數枚橡膠子彈。

2. 被質疑過分使用武力

盧指警方會因應示威者使用的武力，以適當武力回應，「橡膠彈同布袋彈，聽起上嚟好似係子彈，其實係低殺傷力武器，喺外國暴動場面常用」，主要用於制止遠距離掟磚的示威者。

3. 被指無預警下開槍

盧指警方在行動中已多次舉起「黑旗」警告，並以口頭警告，在可行情況下必定採取警告，但如情況極度危急，難以給予警告，「有可能會做咗先再警告都唔定」。

4. 被指射擊示威者頭部

盧指警方有嚴格武力指引及訓練，惟因未知談及哪宗案件、有沒有報警，「究竟係咪真係我哋啲同事令佢受傷，我唔係話唔係，不過你要話畀我聽、叫傷者報案等我哋跟進。」

5. 對於是否必定不會使用實彈

盧指問題空泛，「如果有市民掟汽油彈、用土製炸彈......所以我唔可以咁講」，他又形容昨日情況「好勁」，他多年未見同類場面，但強調警方會保持克制及不亂用武力。

6. 被指到醫院採取拘捕行動

盧指對求診人士有合理懷疑，認為其或涉及暴動便會調查，「唔係話去親醫院，唔理三七廿一就拉咗佢，唔會！」他又反問是否黑社會到醫院後便「唔拉」，但強調警方不會到醫院干擾病人接受治療。

7. 被指對記者態度惡劣，甚至喝罵「記你老X」

盧自言：「從來我對記者係最客氣最有禮貌」，現場記者傳出一陣笑聲，盧又叫記者不要笑，並強調當日情況混亂，或因此造成誤會，並指「如果真係聽到啲同事咁講，咁係佢哋唔啱。」如有記者受不禮貌對待，他對此感到抱歉。

但他強調警方有心與傳媒建立良好關係，在人手緊絀的情況下仍調派32人作傳媒聯絡隊，未來會檢視及加強訓練，令前線警員理解記者工作，盼雙方互相體諒。

8. 對於投考警員是否需要政治中立

盧指以他所知，面試不會問政治問題，政治立場必不是招聘的考慮因素。