【逃犯條例．有片睇】罕有開腔籲港人保持理智 曾俊華給青年、警隊及港人的話

《逃犯條例》修例觸發嚴重警民衝突，截至今晚10時已有逾72人受傷送院，曾與林鄭月娥競選第五屆行政長官的前財政司司長曾俊華深夜發影片指，對今日的事件表示痛心，但提醒港人不要因怒憤埋沒理智，籲警隊勿讓情緒影響專業精神，青年勿做「返唔到轉頭嘅傻事」。

曾俊華致香港人的話全文：

大家好，相信今日大家同我一樣都好唔開心，自從我離開政府以嚟一直希望少談政治，過啲同舊時唔同嘅生活，直至見到今日發生嘅事，令我想以個人身份同大家講幾句說話，香港係我哋屋企，相信無人想傷害香港，我哋嘅社會容許有唔同意見，大家一直可在和平環境下表達意見、選擇喜愛嘅生活。

今次特區政府提出修例，喺社會造成好大回響，引發6月9日大遊行，當日遊行非常有秩序，再一次反映香港人嘅高質素，直到當日晚上有極少部分人士，同警方發生肢體衝突，社會其後嘅意見都好清楚，絕大部分香港人都支持以和平、理性方式去表達訴求。

今日上午再有大批市民包圍立法會同政府總部，到下午發生警民衝突，每一個新聞報道畫面都令我睇得好唔安樂，我喺社交平台見到好多人留言，你哋傷心、害怕、憤怒我完全能夠體會到，因為我同大家一樣都有呢啲感受，但我希望大家千萬唔好畀傷心、害怕、憤怒情緒埋沒理智。

歷史話我哋知，頭腦發熱時候做嘅嘢，從來唔會帶嚟好結果，大家做每一個決定前，都請你哋停一停、諗一諗，唔好畀任何嘢蓋過理性，唔好做一啲會傷害香港、自己同身邊人嘅愚蠢決定，亦唔好做任何暴力行為。

各位警隊朋友，我知道你哋一定面對非常巨大壓力，希望大家能夠維持警隊專業嘅傳統同聲譽，執勤時唔會畀情緒影響專業精神。

各位青年朋友，我都年輕過，我明白你哋依一刻感受，但你哋未來嘅路仍然好漫長，社會需要你哋、香港未來需要你哋，而唔係我哋呢個年紀嘅人，千祈唔好做啲返唔到轉頭嘅傻事。

各位香港人，無論你係支持、反對修例，都要克制爭取理性對話空間，香港係我地屋企，係我哋嘅家，無人會想呢個地方衰，無人會想傷害香港，我希望各位，無論你係邊度、做一切嘅決定，都能夠以保護香港為大前題，以香港末來同我哋下一代為大前題，相信任何風波都可以平息。

{{hket:facebook-video id="2067944420176940"}}{{/hket:facebook-video}}