跳入亞博館 12月演出23場 《獅子王》音樂劇首度來港

「長頸鹿昂然闊步，雀鳥俯衝，羚羊跳躍，仲有威猛嘅『獅子王』」！想睇以上動物，唔一定要搭飛機去非洲，因為嚟緊香港都有得睇！黛安知道，經典百老匯音樂劇《獅子王》12月即將旋風來港演出，香港站仲特別設置咗「劇場模式」，透過舞蹈設計、非洲音樂、語言同風俗等，將非洲廣闊大草原同一眾動物角色帶到香港，門票即日起發售喇！

《獅子王》百老匯音樂劇喺1997年首演，至今已經演出咗21年，一直都係世界上最受歡迎嘅舞台音樂劇目之一，當中主角辛巴由剛出生嘅小獅子到長大，再成為威猛嘅獅子王，呢個充滿勇敢與愛嘅故事，總共吸引咗超過1億人次嘅觀眾入場！

黛安知道，音樂劇由舊年3月喺馬尼拉嘅國際巡演開始，先後到過新加坡、南韓、台灣等地演出，屢破票房紀錄，所到之處座無虛席！

今年12月18日起，劇目更首次親臨香港亞洲博覽館，舉行23場演出，當中仲特別為香港場設置「劇場模式」，將音樂劇場透過舞台、舞蹈設計、大量非洲音樂、語言同風俗等，將非洲廣闊大草原同一眾動物角色重現，令觀眾恍如置身非洲叢林，再次體驗辛巴嘅草原歷險，絕對值得期待！

唔止咁，為咗宣傳劇目，《獅子王》3名演員日前親臨香港參與發布會，仲即場表演咗劇中幾首經典名曲，當黛安一聽到由Zodwa Mrasi飾演嘅拉飛奇，唱出主題曲《Circle Of Life（生生不息）》時，就已經被當中霸氣震懾；而男女主角辛巴同娜拉合唱嘅《Can You Feel the Love Tonight》，亦夠晒甜蜜，真係好想快啲睇到完整版！門票即日起公開發售，想睇記得唔好錯過！