妹妹畢業5年走數拒還學債 哥哥做擔保人收律師信被追數

不少人就讀大專院校時都會向學生資助處申請免入息審查貸款，再於畢業後分期清還。有男網民今早在網上討論區「連登」發帖，指妹妹原來畢業後5年來一直未有還過學債，身為擔保人的他最近因而收到律師信。他為此擔心至夜不能寐，因此只好向廣大網民求助，「我律師信都係第一次收，而家都唔知點算！」

樓主收律師信後十分擔心

該名網民以「原來我個妹5年來無還過學債，收到侓師信」為題發帖，指妹妹細他6年，他十分疼愛對方，妹妹讀大學時亦由他做擔保借學債。妹妹2014年畢業後，他間中收到信通知學貸逾期未還，「頭幾次話佢（妹妹）知佢都話已經還咗，叫我唔使理。」

未料至昨日，他竟收到律師信及執達吏的信，「原來條X街5年來只係還過3期錢，而利息已經疊咗幾皮嘢，仲要畀政府告」。他為此擔心得無法入睡，「我律師信都係第一次收，唔好話畀人告，差館都未去過！而家都唔知點算，又唔知使唔使請律師，又唔知會唔會個信貸評級花咗，又唔知有無案底。X街我行得正企得正，而家搞到好X擔心！」

妹妹：唔想還錢畀呢個政府

他及家人為此對妹妹大興問罪之師，未料「佢好平靜咁話認罪同還番錢就無事」，而且「佢話唔想還錢畀呢個政府」。妹妹指出，如果政府允許她分期還的話，便會承擔責任，「不過係要佢一次過還佢都唔知點」。明天他與妹妹將會與執達主任見面，看看可以如何處理事件。

網民：樓主妹妹不負責任

此事引來網民熱議，不少人認為樓主妹妹不負責任，「佢竟(既)然咁唔鍾意政府當初為何仲要向政府借錢？」、「咁冇責任心遲早你畀你阿妹跣鑊甘嘅然後等瞓街」、「準備申請破產啦，你阿妹係唔會還錢㗎啦，你之後都買唔到樓，信貸評級跌咗幾級」。

另有網民勸樓主不應再縱容妹妹，「你依家仲幫佢就等於害佢，你唔畀啲教訓佢遲早害死佢」、「追你阿妹還錢，唔係就報警」、「佢都已經係成年人，就要負番成人應有嘅責任，畀你阿妹啲蘇州屎搞到惹官非上身，呢個時候仲保佢等於害咗佢，第時買樓搵你做擔保人你就後悔一世啦」。

律師：擔保人有機會破產

律師黃國桐曾在接受《香港經濟日報》訪問時表示，簽署任何擔保契約時擔保人與欠債人的地位相同，故債權人未能成功追討欠債人時，便可直接向擔保人追討全盤債務。因此，無力償還貸款的擔保人，有機會因而破產。但如擔保人有能力還款，可要求與學資處簽一封權利轉讓書（Assignment of right），讓擔保人代為還款後，可直接追討欠債人；就算沒有這封轉讓書，擔保人仍可告上法庭，但訴訟會較困難。至於欠債人的親人，由於沒有涉及契約內，故法律上並無任何代還債務的責任。