要求多個優惠同時使用被拒 1家6口堅持分單拍枱罵侍應

不少人將「顧客至上」的概念濫用，難為了一眾服務業前線人員。一名餐廳侍應在網上大吐苦水，指日前有1家6口前來用餐時出示優惠券，要求與另兩個優惠同時使用；由於餐廳規定每次只能用一個優惠，因此他拒絕要求。未料，對方為了成功獲得優惠，竟即時要求分單；雖已獲餐廳妥協，但仍態度惡劣。侍應沉不住氣反唇相稽，其中一名男子被惹怒得差點動粗，最終拉大隊走人了事。

客人要求優惠同時使用

該名侍應向Facebook專頁「西客之道 Hispitality Secret」發文，指其任職餐廳近日分別有「快閃優惠」及「龍蝦優惠」，性質一樣可同時使用，但其他優惠則規定不可。上月23日晚8時許，有6名疑似一家人的客人前來用餐，「一開始都冇乜嘢，直到佢哋叫餐嘅時候，叫咗快閃優惠、龍蝦優惠，之後show咗張Coupon話想要埋個加送pizza嘅優惠。我嗰下呆一呆，轉頭問經理可唔可以用。佢搖晒頭話唔得，我就同班客解釋。」

被拒後要求分單

他向客人表示，如果選擇要用優惠券，「快閃優惠」及「龍蝦優惠」便會失效，「未料個小姐黑咗一陣面，然後話：『我唔理啦，總之我就要用個優惠。』然後，佢老竇又出聲：『有冇搞錯啊，你畀得張coupon要我返嚟食，就應該畀個優惠我㗎啦。』之後有到佢阿媽出聲：『咁你幫我分單啦，我哋三個人一張枱，你當我哋搭枱食咪得囉。』」

經理最終妥協

起初餐廳經理按規定不接受分單，但最終仍然妥協，讓他們6人分枱吃。此時，一名負責打單的職員上前問侍應「咁佢哋即係要分幾多張單食」，「正當我解釋緊佢哋分開1、2號枱食嘅時候，個阿媽突然嘈起上嚟：『我理得你要打幾多張單啫，總之我就係要個優惠咋嘛。我咪同你個經理講咗囉，你有冇聽嘢㗎？』見佢越講越大聲，我就唯有大聲啲同佢講：『OK冇問題，個優惠我哋照出畀你，我只不過同佢解釋緊打單嘅程序⋯⋯』」

佢阿媽就越嚟越惡，仲指住個女同事話：「解咩釋啫？我叫你分單咪分單囉，你唔係連少少野都做唔到呀嘛⋯⋯」
我呢下真係躁咗，用近乎鬧佢嘅語氣話：「得啦，我哋明白㗎啦。我只係同佢解釋緊⋯⋯」
佢阿媽就突然拍枱：「你而家咩態度呀？」
有個又係做waiter嘅肥仔見對路，就即刻推咗我埋一邊sideboard。點知佢老竇仲要攞返個尾彩：「除低件衫唔好做吖嘛。」
我反駁：「咁你唔好黎食呀嘛。使唔使幫你報警處理啊？」

男客作勢打人

其中一名男客人因被侍應之言惹怒，衝上前作勢打人，被終被人阻止。最後，1行6人怒氣沖沖地離去。對此，侍應在文中直指他們是「無賴」，同時亦承認自己態度有問題；但他認為侍應並非黃大仙有求必應，「每一個地方都有佢自己嘅 regulation（規矩）」。

網民反應兩極

對此，不少網民認為該班客人很有問題，「無錢就咪學人出街食飯，你唔嚟食，餐廳唔會執笠」、「應該請佢哋出去重新排過隊，再同佢地安排兩張枱3個人坐，隔開九丈遠咁就Perfect」、「駛乜同佢勞氣，叫廚房好好招呼佢哋張單咪得囉」。不過，亦有網民認為侍應本身態度不佳，經理處理手法亦不妥當，所以此事並不能完全怪罪客人。