1哩新星「美麗傳承」 代表香港出戰國際賽

唔少港人都熱衷跑馬，嚟緊又有國際賽上演！黛安講緊嘅係嚟緊星期日（28日）喺沙田馬場舉行嘅富衛保險冠軍賽馬日，當日會上演3項國際一級賽，分別係總獎金有2,400萬元嘅2,000米富衛保險女皇盃；1,600米富衛保險冠軍1哩賽，總獎金有1,800萬元；仲有1,200米主席短途獎，獎金有1,600萬元。而莎莎國際控股主席郭少明細仔郭浩泉（Patrick）擁有嘅「美麗傳承」將會代表香港出戰冠軍1哩賽。

黛安就同兩父子傾過，Patrick話「美麗傳承」係佢首匹以個人名義所養嘅馬匹，仲話雖然自己對馬敏感，每次探完馬，臉部都會腫，但仍好享受。郭少明就話，原先買「美麗傳承」係準備跑打吡，但首季表現一般，練馬師上季就安排佢轉跑1哩賽事，點知表現就好出眾，令佢哋得到啟發，認為馬同人嘅經歷好似，唔好因為起初表現唔好就失望。

上周創健力士紀錄

另外，黛安喺上星期五參加咗馬會喺沙田馬場同彭福公園舉行嘅「同心同步同樂日」，當日有過千人一齊成功挑戰「最大規模的摺紙課」嘅健力士世界紀錄，親手完成1,073朵摺紙花。當日仲公布4個慈善項目，包括「賽馬會『長幼情』跨代共融計劃」，捐出咗6,200萬元，令7.8萬人受惠人數！