巴士男狂投訴為2蚊追到底 車長發惡：「停低架車慢慢玩都得！」

「搭巴士多嘢睇，搭的士多嘢聽」著名填詞人梁栢堅日前搭巴士時就遇上一件趣事，有乘客因2元車資向車長投訴，幾乎煩足客服全程，險令車長被迫停駛處理，阻礙其他乘客行程，而乘客之一的梁栢堅更指自己特意遲兩站落車，只為追看「故事結局」。

上一程被多收2元 乘客要求減價被拒

填詞人梁栢堅於其個人Facebook專頁發文，指日前乘巴士前往銅鑼灣途中，一位戴眼鏡男子於中環上車，甫上車就向車長表示：「頭先我搭架城巴司機唔記得轉收費，我呢程畀返少啲」，聲稱已記下前一輛巴士車牌號碼，要求司機少收2元車資。

惟車長堅拒「減價」，指乘客必需繳付足夠車資，並著對方自行打電話聯絡客戶服務部查詢解決方法。

乘客致電客服追討 落車始「開戰」

梁栢堅指當時滿以為車長會「玩嘢」停駛處理事件，不料車長如常開車，向乘客指：「你打電話啦我開車！」該眼鏡男則站在駕駛座旁致電客服，期間不斷要求「回水」2元，惟言談間巴士已抵達銅鑼灣，眼鏡男只好以八達通「拍卡」付正價落車。

車上雙方未有發生拗撬，豈料到落車才發生口角。梁栢堅形容當時情況指，

眼鏡男：「麻煩晒車長。」
司機：（豪氣串咀）「唔麻煩呀，你鐘意玩我同你停低架車慢慢玩都得！」
眼鏡男：（指著司機）「依家你係返工㗎唔係玩嘢！」
司機：「嗰兩蚊喺度搞咁多嘢喺度追，唔知以為爭你廿萬！」

網民意見兩極 梁栢堅：「打和啦Super」

梁栢堅指自己為見證整個事件不惜多搭兩個站落車，但仍覺得物超所值，「剩係呢個故事都唔止值兩蚊」。他亦未有明撐任何一方，只在hashtags寫「打和啦super」。

此巴士趣聞引起網民熱議，有人指眼鏡男執著區區2元的態度小家，「男人老狗為嗰區區兩蚊嘈喧巴閉嘥時間」、「我見到一定攞兩蚊出嚟然後叫4眼佬收聲！」。但仍有人力撐眼鏡男欲討回公道並無不妥，「收多錢擺明唔啱...覺得2蚊唔係錢嘅麻煩一人轉2蚊畀我」、「（眼鏡男）都叫跟足程序、守規矩同有禮貌啦」。