電話號碼太相似客人常打錯 打工仔接投訴：我要你公司轉電話

電話號碼因與他人太相似，而經常接到陌生人來電，的確是件煩擾之事。但大家又會否因此而轉電話，甚或要求對方轉電話？有打工仔表示，早前在公司接到一個投訴電話，對方竟因上述問題要求其公司轉電話，更稱如果他沒向公司表達相關問題，就「投訴到你暈」，令他大感無奈。

公司接投訴要求轉電話

Facebook專頁「西客之道 HIspitality Secret」日前發出貼文，刊登了一名打工仔的投稿。該名打工仔表示，自己有日在公司接到一通投訴電話：

我: 你好，XX公司，有咩可以幫到你
客: 你公司落單電話係咪xxxxxx78
我: 係呀，有咩幫到你
客: 係咁嘅，我屋企電話就係xxxxxx89，你公司啲人客成日打錯咗俾我，造成我好大嘅騷擾，你幫我同你公司反映下，叫你公司轉咗個電話，唔係你哋公司啲客成日打俾我都唔係辦法

投訴者：無通知公司實投訴到你暈

該名打工仔聽到後表示「唔好意思」，未料對方竟隨即「著火」大罵：「咁即係點呀，唔好意思就算啦？即係明知錯都唔改啦，我上年申請咗個電話就一直不斷俾人騷擾啦，你估你哋大公司大曬呀，你叫咩名，呢啲係咩服務態度呀，我要投訴你呀，有人投訴就要通知公司架啦，如果俾我知道你無通知公司改電話，我實投訴到你暈呀！」打工仔十分無奈，回應稱「唔好意思，你嘅意見我會落返紀錄」。

不過，對方對其回應並不收貨，「點呀......我唔洗你唔好意思，我要知你哋幾時改電話……你話唔到事，唔好曬(嘥)我時間，搵你最大嘅同我講！」該名打工仔最後在文末無奈地稱：「點解會有人覺得一間公司會為佢一個人改電話？」

網民：不如自己轉電話

此事引來大批網民熱議，不少人表示投訴者十分野蠻，「咁不如佢自己改電話啦」、「應該將自己的電話號碼賣俾呢間公司嘅競爭對手」、「遲來先上岸？公司個電話早開通過你，你反而叫人就你改電話？」、「嚴格啲黎講，佢連客都唔係，自己轉電話囉」。另有人指出，涉事公司亦應將自己正確電話號碼公告天下，「如果我係呢間公司marketing，我會將呢段對話放上專頁，公告話俾啲客知唔好再打錯俾人啦」。

此外，亦有不少網民分享各種相似經歷：

• 想當年我朋友個電話同同某個火葬場電話差唔多.......一係收到有人打俾佢問價，一係搵佢果時打錯去火葬場……
• 我舊公司個電話同防止自殺會個電話差一個數字，成日都有人打嚟一開口就話我好想死.......
• 以前成日有人打嚟搵神父（聽語氣應該係花名）。有日終於忍唔住，爆佢：呢度係少林寺，得方丈，佢好小氣㗎！之後就無再打嚟
• 我公司新舖用咗某餐廳嘅舊電話（openrice同各大app都登記咗），成日有人要訂枱訂燒豬。有次同佢講打錯咗，竟然問我點算，係咪想我搵隻燒豬賣俾你.......
• 我媽度以前有段時間成日有人叫外賣，我媽照答好，之後打嚟追就話出咗啦，等陣啦
• 我都試過有地產嘅經紀成日飛錯咗佢office 條線去我手提電話，結果我有一次幫佢趕走晒所有客~~
• 我諗起我睇過一篇因為錯電話，而令到Pizza店執笠嘅故事
• 改電話小事啦！有個人打嚟我公司想見工嫌太遠叫我搬寫字樓添啊！

對此，不少網民認為以上經歷爆笑非常，笑言「留言真係正到爆」、「留言高汁」、「啲留言經歷好好笑」，更標籤（Tag）自己的朋友到文內「睇留言」。