【港人返工第一】伯伯跌爆頭返工男無私相助 上司無視解釋照當遲到

「返工大過天」，港人對準時返工抱有無限執著，對身邊事物越見漠不關心。一位打工仔今早（27日）在快餐店目睹老人跌倒導致頭部致嚴重出血，他即時無私相助，協助報警求留守現場，擔心上班遲到，預先通知上司，豈料對方竟無視解釋，表示會照當一般遲到處理，事主大嘆港人冷漠「返工第一」。

老伯跌倒頭流血 多人在場無人幫手

該名打工仔今日在Facebook群組發帖分享，指今早於一間快餐店內，目睹一位老伯伯失衡跌倒，頭部嚴重出血。雖見老伯隨時有生命危險，然而現場多位食客與職員均視若無睹，「做野嘅繼續做野，返工嘅食完就閃人，街坊繼續做塘邊鶴」，連簡單致電報警都懶做，事主決定上前協助，期間另有一男一女，以及一位保安員，留守現場直至救護員到場。

公司處理不近人情 「都係當你遲到」

協助警方調查需時，眼見上班時間已到，事主透過WhatsApp向公司交代情況，並拍下照片作為證據，然而上司亦對照顧老伯一事不以為然，回覆稱：「點解係你報警唔係職員報呢？都係當你遲到囉，公司冇呢類情況指引」。

事主大嘆自己只是盡公民責任，形容香港人「返工第一」特質並非一朝練成，「促成社會嘅冷漠程度，要多得各大財團、老闆政策催化」。

事件引起網民熱議，批評當時在場者的冷漠「各家自掃門前雪，那管他人瓦上霜，香港人就係越嚟越差」、「到時呢個情況發生係佢屋企人就會明白」。雖然事主趕及最後一刻打卡不致遲到，但事主公司的處理手法仍為網民不齒「咁涼薄嘅（公司）唔打佢工絕對唔係損失」、「寧遲到扣錢/被炒，我都唔會見死不救」。