魚扣外型怪主婦想嘔 專家：口感彈牙營養高

魚扣大家可能食過，但如手掌般大的又曾否見過？近日一位網民分享自己在街市「執到寶」，買下多條巨型魚扣，不過由於其外型怪相，令不少入廚新手大呼「作嘔」，並好奇如何烹調。海鮮專家則笑言市民不用「怕核突」，其實這是龍躉扣，口感彈牙且具營養。

一位元朗街坊昨晚（11日）在Facebook群組「食在元朗」分享，指在街市買了10多條巨型魚扣，「見到咁新鮮一口氣同檔主買落，平時好少見到咁大咁新鮮，應該有好多人唔知係什麼東西」。

由於該些魚扣外型怪相，網民均嘖嘖稱奇，部分廚房初哥猜測：「肉靈芝？」、「牛歡喜？」，有人則笑言與人體器官相似，有人則大呼「嘔心」、「想嘔」。

龍躉扣量少 專家：配鮑魚一流

香港海鮮聯合總會主席李彩華接受《晴報》訪問時表示，魚扣其實是魚的胃部，他形容：「有咁大個魚扣條魚一定唔細」，相信圖中所見為龍躉扣。他指魚扣經烹調後口感彈牙，具極高營養，炆稔切開後與豬肚相似。

不過，由於一條魚只有一個胃，李彩華表示魚檔每日一般只劏一至兩條龍躉，如此大量龍躉扣相信「要儲幾日先夠」，而「識食之人」會要求魚檔預留，「一般可以用嚟炆海參，如果食豪啲，可以加鮑魚一齊扣，超正！」

李彩華又笑言：「市民不要怕核突，好嘢嚟！」至於圖中部分魚扣長有類似肉瘤，他指屬正常現象，只要切除便可照常食用，如果仍然擔憂則可要求魚檔退貨或換貨。

{{hket:inline-image name="3.jpg"}}{{/hket:inline-image}}

{{hket:inline-image name="5.jpg"}}{{/hket:inline-image}}